ឯកឧត្តម សុខ ចាន់ភក្តី ដឹកនាំក្រុមការងារចុះពិនិត្យបញ្ជីឈ្មោះ និងចុះឈ្មោះបោះឆ្នោតនៅឃុំដារ ស្រុកចិត្របុរី ខេត្តក្រចេះ

ខេត្តក្រចេះ៖ នាព្រឹកថ្ងៃសុក្រ ទី១៦ ខែតុលា ឆ្នាំ២០២៦ រដ្ឋបាលឃុំដារ ស្រុកចិត្របុរី ខេត្តក្រចេះ មានកិត្តិយសយ៉ាងក្រៃលែង ដែលបានទទួលស្វាគមន៍ ឯកឧត្តម សុខ ចាន់ភក្តី រដ្ឋលេខាធិការក្រសួងព័ត៌មាន និងជាប្រធានក្រុមការងារចុះជួយមូលដ្ឋានស្រុកចិត្របុរី ព្រមទាំងឯកឧត្តម លោកជំទាវ និងសមាជិកក្រុមការងារ ដែលបានអញ្ជើញចុះពិនិត្យបញ្ជីឈ្មោះ និងចុះឈ្មោះបោះឆ្នោតនៅតាមការិយាល័យក្នុងឃុំដារ។

ក្នុងឱកាសនោះ ឯកឧត្តម សុខ ចាន់ភក្តី និងក្រុមការងារ បានអំពាវនាវដល់ពុកម៉ែ បងប្អូនប្រជាពលរដ្ឋទាំងអស់ ឱ្យយកចិត្តទុកដាក់ពិនិត្យបញ្ជីឈ្មោះបោះឆ្នោត និងអញ្ជើញទៅចុះឈ្មោះបោះឆ្នោតឱ្យបានគ្រប់ៗគ្នា ដើម្បីធានាថា ប្រជាពលរដ្ឋដែលមានសិទ្ធិបោះឆ្នោត អាចប្រើប្រាស់សិទ្ធិរបស់ខ្លួនបានត្រឹមត្រូវស្របតាមច្បាប់។

ការចុះពិនិត្យបញ្ជីឈ្មោះ និងការចុះឈ្មោះបោះឆ្នោតនេះ គឺជាការចូលរួមចំណែកក្នុងការលើកកម្ពស់ការយល់ដឹងរបស់ប្រជាពលរដ្ឋអំពីសិទ្ធិ និងកាតព្វកិច្ចក្នុងការបោះឆ្នោត ព្រមទាំងជំរុញឱ្យប្រជាពលរដ្ឋត្រៀមលក្ខណៈបានគ្រប់គ្រាន់សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ ដែលគ្រោងនឹងប្រព្រឹត្តទៅនៅថ្ងៃអាទិត្យ ទី៦ ខែមិថុនា ឆ្នាំ២០២៧។

ជាមួយគ្នានេះ រដ្ឋបាលឃុំដារ ក៏បានអំពាវនាវដល់ប្រជាពលរដ្ឋក្នុងមូលដ្ឋានទាំងអស់ សូមចូលរួមពិនិត្យផ្ទៀងផ្ទាត់ព័ត៌មានរបស់ខ្លួនក្នុងបញ្ជីឈ្មោះបោះឆ្នោត និងអនុវត្តតាមនីតិវិធីដែលបានកំណត់ ដើម្បីធានាថា គ្រប់គ្នាដែលមានសិទ្ធិបោះឆ្នោតអាចចូលរួមក្នុងដំណើរការបោះឆ្នោតនាពេលខាងមុខបានដោយរលូន។