អ្នកនាំពាក្យ៖ វិវាទអ្នកសារព័ត៌មាន២៣ករណី ត្រូវក្រសួងព័ត៌មានសម្របសម្រួល ផ្សះផ្សាដោយជោគជ័យ គិតត្រឹមត្រីមាសទី៣ ឆ្នាំ២០២៥

ភ្នំពេញ)៖ លោក ទេព អស្នារិទ្ធ អនុរដ្ឋលេខាធិការ និងអ្នកនាំពាក្យក្រសួងព័ត៌មាន បានឱ្យដឹងនៅថ្ងៃទី២៧ ខែតុលា ឆ្នាំ២០២៥ថា គណៈកម្មការតាមដាន វាយតម្លៃ និងលើកសរសើរការអនុវត្តក្រមសីលធម៌ វិជ្ជាជីវៈសារព័ត៌មាន នៃក្រសួងព័ត៌មាន បានទទួល និងដោះស្រាយបណ្តឹងពាក់ព័ន្ធនឹងអ្នកសារព័ត៌មានសរុបចំនួន២៣ករណី គិតចាប់តាំងពីខែមករា រហូតដល់ដើមខែតុលា ឆ្នាំ២០២៥។ ការសម្របសម្រួលដោះស្រាយវិវាទបានផ្តល់យុត្តិធម៌ ជូនអ្នកសារព័ត៌មាន និងភាគីក្នុងរឿង ព្រមទាំងការពារអ្នកកាសែតពីការប្រឈមនឹងវិធានការផ្លូវច្បាប់ធ្ងន់ធ្ងរ។

លោកបានឱ្យដឹងថា «សម្រាប់រាល់បណ្តឹងទាំងអស់ដែលក្រសួងបានទទួលការស្នើសុំឱ្យជួយដោះស្រាយ គណៈកម្មការបានពិនិត្យ និងវិភាគយ៉ាងល្អិតល្អន់ទាំងលើអង្គហេតុ និងអង្គច្បាប់ ហើយបានអញ្ជើញភាគីពាក់ព័ន្ធ ក្នុងសាច់រឿងមកចូលរួម ក្នុងដំណើរការនីតិវិធីសម្រុះសម្រួល ដោយឈរលើមូលដ្ឋាននៃច្បាប់ស្តីពីរបបសារព័ត៌មាន និយាមវិជ្ជាជីវៈ ធម្មនុញ្ញវិជ្ជាជីវៈសារព័ត៌មាន កាតព្វកិច្ចក្នុងក្របខណ្ឌកិច្ចសន្យាអាជីវកម្មសារព័ត៌មាន និងលិខិតបទដ្ឋានពាក់ព័ន្ធ»។

អ្នកនាំពាក្យរូបនេះ បានពន្យល់ថា៖ «ក្នុងដំណើរការនីតិវិធីសម្រុះសម្រួល កំហុសវិជ្ជាជីវៈសារព័ត៌មាន ទង្វើខុសក្រមសីលធម៌ ត្រូវបានវែកញែក វិភាគដោយតម្លាភាព យុត្តិធម៌ និងវិជ្ជាជីវៈ ដើម្បីផ្សះផ្សាបញ្ចប់វិវាទ ដោយមានសេចក្តីសន្និដ្ឋាន របាយការណ៍ច្បាស់លាស់ ដែលភាគីពាក់ព័ន្ធក្នុងវិវាទបានព្រមព្រៀងទទួលយក។ រីឯកំហុសខ្លឹមសារផ្សាយត្រូវបានកែតម្រូវ និងផ្សាយឡើងវិញជាមួយព័ត៌មានត្រឹមត្រូវ មានប្រភព និងយោងគ្រប់គ្រាន់ ដែលភាគីវិវាទបានទទួលយករៀងៗខ្លួន ហើយអ្នកសារព័ត៌មានបានទទួលការតម្រង់ទិសលើការប្រតិបត្តិវិជ្ជាជីវៈ និងក្រមសីលធម៌សារព័ត៌មាន ដើម្បីបន្តអនុវត្តការងារឱ្យបានប្រសើរដោយគោរពច្បាប់ និងក្រមសីលធម៌វិជ្ជាជីវៈ»។

បន្ថែមពីនេះលោក ទេព អស្នារទ្ធិ បានបញ្ជាក់ថា យ៉ាងណាក៏ដោយ សម្រាប់ករណីវិវាទមួយចំនួន ត្រូវទទួលការដាក់ពិន័យស្របតាមច្បាប់ស្តីពីរបបសារព័ត៌មាន ក្នុងនោះមានការចេញលិខិតព្រមានចំពោះអង្គភាពសារព័ត៌មាន អ្នកសារព័ត៌មានដែលបំពានក្រមសីលធម៌ និងការប្រព្រឹត្តផ្ទុយលក្ខខណ្ឌកំណត់ក្នុងកិច្ចសន្យាអាជីវកម្មសារព័ត៌មាន ខណៈករណីមួយចំនួនតូច អង្គភាពសារព័ត៌មានត្រូវបានលុបអាជ្ញាបណ្ណអាជីវកម្មដោយមូលហេតុ បំពានក្រមសីលធម៌ធ្ងន់ធ្ងរ ល្មើសនឹងបទប្បញ្ញតិ្តច្បាប់ជាធរមាន។

ក្រៅពីយន្តការថ្នាក់ជាតិ ការពង្រឹងទំនាក់ទំនងការងារជាមួយអង្គភាពសារព័ត៌មាន អ្នកសារព័ត៌មាននៅក្នុងមូលដ្ឋានរាជធានី ខេត្តទាំង២៥ តាមរយៈការសម្របសម្រួលដោយមន្ទីរព័ត៌មាន ក្នុងនាមជាសេនាធិការរបស់រដ្ឋបាលរាជធានី ខេត្ត ត្រូវបានធ្វើឡើងជាប្រចាំ ក្នុងគោលបំណងរួមចំណែកពង្រឹងការប្រតិបត្តិក្រមសីលធម៌ និងលើកកម្ពស់គុណភាពវិជ្ជាជីវៈក្នុងការផលិត និងផ្សព្វផ្សាយព័ត៌មាន។

លោក ទេព អស្នារិទ្ធ អ្នកនាំពាក្យក្រសួងព័ត៌មាន បានគូសបញ្ជាក់ថា៖ «ការបង្កើនទំនាក់ទំនងការងារជាមួយអង្គភាពសារព័ត៌មាន អ្នកសារព័ត៌មាននៅក្នុងមូលដ្ឋានរាជធានី ខេត្ត គឺដើម្បីលើកកម្ពស់តួនាទី និងភារកិច្ចរបស់អ្នកសារព័ត៌មាន ដោយអនុលោមតាមច្បាប់ ក្រមសីលធម៌ ធម្មនុញ្ញវិជ្ជាជីវៈសារព័ត៌មាន»។

លោកបានបន្ថែមថា៖ «យន្តការលើកកម្ពស់ទំនាក់ទំនងសារព័ត៌មាននៅថ្នាក់មូលដ្ឋានរួមចំណែកធានាការទទួលព័ត៌មានពិត សុក្រឹត របស់ប្រជាពលរដ្ឋ អំពីស្ថានភាព និងវឌ្ឍនភាពនៅមូលដ្ឋាន, ជំរុញប្រសិទ្ធភាពការងារសាធារណមតិ និងការទប់ស្កាត់ព័ត៌មានក្លែងក្លាយ។

អ្នកនាំពាក្យក្រសួងព័ត៌មាន បានរម្លឹកថាអ្នកសារព័ត៌មានទាំងអស់ ត្រូវអនុវត្តការងារដោយការទទួលខុសត្រូវវិជ្ជាជីវៈ តាមរយៈការពង្រឹងសមត្ថភាពផលិត-ផ្សាយព័ត៌មានដោយគុណភាព ហើយមិនត្រូវដើរតួនាទីជំនួសសមត្ថកិច្ចឡើយ។

«សូមអ្នកសារព័ត៌មានខិតខំស្រាវជ្រាវអំពីប្រធានបទនីមួយៗ មុនចុះយកព័ត៌មាន ដើម្បីឱ្យមានមូលដ្ឋានច្បាស់លាស់ក្នុងការផលិតមាតិកា និងផ្សាយខ្លឹមសារមានគុណភាព ជាប្រយោជន៍សម្រាប់ប្រជាពលរដ្ឋ និងសង្គមជាតិ»។ នេះបើតាមការលើកឡើងបន្ថែមរបស់អ្នកនាំពាក្យក្រសួងព័ត៌មាន។

លោក ទេព អស្នារិទ្ធ បានសង្កត់ធ្ងន់លើសារៈសំខាន់ ដែលអ្នកសារព័ត៌មានត្រូវធ្វើខ្លួនជាបុគ្គលគំរូដល់សង្គម ដោយត្រូវប្រកាន់ខ្ជាប់នូវគោលការណ៍ផ្តល់ព័ត៌មានពិត មានប្រភពច្បាស់លាស់ ដោយគោរពក្រមសីលធម៌វិជ្ជាជីវៈត្រឹមត្រូវ ព្រោះកត្តាទាំងអស់នេះនឹងផ្តល់សុវត្ថិភាពសម្រាប់ការអនុវត្តការងារ និងជួយការពារអ្នកសារព័ត៌មាន ពីការប្រឈមនឹងបញ្ហាផ្លូវច្បាប់ផងដែរ៕