ឧបនាយករដ្ឋមន្រ្តី កើត រិទ្ធ ចេញអធិបញ្ជាឱ្យប្តឹងឧទ្ធរណ៍ករណីលោក ហ៊ុន ហេង អតីតនគរបាលរាជធានីភ្នំពេញ បើកឡានបុកស្លាប់ និងរបួស ហើយត្រូវផ្តន្ទាទោស៣ឆ្នាំ តែអនុវត្តនៅក្នុងពន្ធនាគារតែ១ឆ្នាំ

ភ្នំពេញ)៖ ឧបនាយករដ្ឋមន្រ្តី កើត រិទ្ធ រដ្ឋមន្រ្តីក្រសួងយុត្តិធម៌ នៅថ្ងៃទី១៦ ខែតុលា ឆ្នាំ២០២៥នេះ បានចេញអធិបញ្ជាឱ្យព្រះរាជអាជ្ញាប្តឹងឧទ្ធរណ៍ ចំពោះសាលក្រមសាលាដំបូងរាជធានីភ្នំពេញ ដែលសម្រេចផ្តន្ទាទោសលើជនជាប់ចោទឈ្មោះ ហ៊ុន ហេង ភេទប្រុស អាយុ៦១ឆ្នាំ ដាក់ពន្ធនាគារ កំណត់រយៈពេល ០៣ (បី) ឆ្នាំ ដោយទោសនេះត្រូវអនុវត្តទោស ក្នុងពន្ធនាគាររយៈពេល ១ឆ្នាំ ទោសសល់ពីនេះត្រូវព្យួរ និងពិន័យជាប្រាក់ចំនួន ៤ ០០០ ០០០ (បួនលាន) រៀលពីបទ បើកបរបង្កគ្រោះថ្នាក់ចរាចរណ៍ បណ្តាលឱ្យស្លាប់ និងរបួសអ្នកដទៃ ប្រព្រឹត្តនៅចំណុចមុខក្រសួងវប្បធម៌ និងវិចិត្រសិល្បៈ មហាវិថីព្រះនរោត្តម ភូមិ១០ សង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីថ្ងៃទី១៥ ខែឧសភា ឆ្នាំ២០២៥។

ជាមួយគ្នានេះ ព្រះរាជអាជ្ញាអមសាលាដំបូងរាជធានីភ្នំពេញ ក៏បានសម្រេចប្តឹងឧទ្ធរណ៍លើករណីនេះផងដែរ ព្រោះយល់ឃើញថា ការសម្រេចផ្តន្ទាទោសចជនបង្កដាក់ពន្ធនាគារ៣ឆ្នាំ តែអនុវត្តទោសក្នុងពន្ធនាគារតែមួយឆ្នាំ ព្រមទាំងពិន័យជាទឹកប្រាក់ ៤លានរៀល គឺនៅស្រាល មិនសមចំពោះទង្វើដែលជនបង្កបានប្រព្រឹត្ត។