ឯកឧត្តមបណ្ឌិត អ៊ាង សុផល្លែត រដ្ឋមន្តី ក្រសួងបរិស្ថាន និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តត្បូងឃ្មុំ

ក្រុមការងាររាជរដ្ឋាភិបាលចុះមូលដ្ឋានសំដៅចូលរួមគាំទ្រនិងអនុវត្តកម្មវិធី គោលនយបាយអោយសម្រេចតាមចក្ខុវិស័យវិស័យនៅឆ្នាំ២០៥០ ឯកឧត្តមបណ្ឌិត អ៊ាង សុផល្លែត រដ្ឋមន្តី ក្រសួងបរិស្ថាន និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តត្បូងឃ្មុំ បានធ្វើឡើងនៅព្រឹកថ្ងៃទី២៤ ខែមករា ឆ្នាំ២០២៤នេះ ក្នុងឱកាសអញ្ជើញជាអធិបតីភាពប្រគល់ភារកិច្ចការងារដល់ក្រុមការងារចុះមូលដ្ឋានខេត្តត្បូងឃ្មុំ និងបើកកិច្ចប្រជុំ លើកដំបូងរបស់ក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ និងជំរុញការអនុវត្តកម្មវិធី នយោបាយ យុទ្ធសាស្ត គោលនយោបាយ និងកម្មវិធីកំណែទម្រង់ នានារបស់រាជរដ្ឋាភិបាល ដើម្បីបម្រើផលប្រយោជន៍ និងសេចក្តី ត្រូវការរបស់ប្រជាពលរដ្ឋនៅតាមមូលដ្ឋាន និងចូលរួមបំផុស ចលនាឱ្យមានការគាំទ្រ ការចូលរួមពីប្រជាពលរដ្ឋគ្រប់មជ្ឈដ្ឋាន ក្នុងការកសាងអភិវឌ្ឍឱ្យមានការរីកចម្រើនគ្រប់វិស័យ។

ឯកឧត្តមបណ្ឌិត អ៊ាង សុផល្លែត បានបន្តថា ឈរលើមូលដ្ឋាន បទពិសោធន៍ និងសមិទ្ធផលដែលសម្រេចបានកន្លងមកនេះ រាជរដ្ឋាភិបាលកម្ពុជា ដែលមាន សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជាប្រមុខបានដាក់ចេញនូវកម្មវិធី នយោបាយរាជរដ្ឋាភិបាលសម្រាប់ នីតិកាលទី៧ នៃរដ្ឋសភា និង យុទ្ធសាស្ត្របញ្ចកោណ ដំណាក់កាលទី១ ដើម្បីកំណើនការងារ សមធម៌ ប្រសិទ្ធភាព និងចីរភាព ដោយកំណត់យកអាទិភាពគន្លឹះ ចំនួន៥ គឺ៖ «មនុស្ស ផ្លូវ ទឹក ភ្លើង និងបច្ចេកវិទ្យា»។
ឯកឧត្តមបណ្ឌិត បានបន្ថែមថា ដើម្បីរក្សាចលនកានៃសុខសន្តិភាព កំណើន និងលើកកម្ពស់ផលិត ភាពសេដ្ឋកិច្ច ក៏ដូចជាសន្ទុះនៃការ អភិវឌ្ឍប្រទេសជាតិ ក្នុងការឆ្លើយតបនឹងបដិវត្តឧស្សាហកម្មទី៤ និងកសាងភាពធន់វិស័យសាធារណៈ សេដ្ឋកិច្ច ហិរញ្ញវត្ថុ មូលធន មនុស្សនិងសង្គម និងភាពធន់នៃវិស័យបរិស្ថាន ឆ្ពោះទៅ សម្រេច បាននូវគោលដៅឆ្នាំ២០៣០ ប្រែក្លាយកម្ពុជាទៅជាប្រទេសដែល មានចំណូលមធ្យមកម្រិតខ្ពស់ និងកវិស័យឆ្នាំ២០៥០ ជាប្រទេសដែលមានចំណូលខ្ពស់។

នេះគឺជាបំណងប្រាថ្នាប្រកបដោយ មហិច្ឆតា ដែលទាមទារឱ្យយើងទាំងអស់គ្នាដុតដៃដុតជើង ក្នុង ការដឹកនាំអនុវត្តដើម្បីសម្រេចបាននូវគោលដៅ និងចក្ខុវិស័យរបស់កម្ពុជា។

ដើម្បីតម្រង់ទិស និងជំរុញប្រសិទ្ធភាពចូលរួមអនុវត្ត គោលនយោបាយអាទិភាពនានា ជាពិសេសយុទ្ធសាស្ត្របញ្ចកោណ ដំណាក់កាលទី១ និងផែនការយុទ្ធសាស្ត្ររបស់រាជរដ្ឋាភិបាល, ឯកឧត្តមបណ្ឌិត អ៊ាង សុផល្លែត បានជំរុញឱ្យក្រុមការងារ រាជរដ្ឋាភិបាលចុះមូលដ្ឋានខេត្ត ក្រុង ស្រុក ឃុំ សង្កាត់ នៃខេត្ត ត្បូងឃ្មុំ ពង្រឹងឱ្យបាននូវភាពជាម្ចាស់ វិន័យ សាមគ្គីភាព និង ការទទួលខុសត្រូវ៕