សម្ដេចក្រឡាហោម ស ខេង ជួបសំណេះសំណាលជាមួយតំណាងជនភៀសសឹកចំនួន៦ភូមិ នៅខេត្តបន្ទាយមានជ័យ

(បន្ទាយមានជ័យ)៖ សម្ដេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ បានអញ្ជើញជួបសំណេះសំណាលជាមួយតំណាងជនភៀសសឹកចំនួន៦ភូមិ។ ក្នុងពិធីនេះ ក៏មានការចូលរួមពីលោក កែ គឹមយ៉ាន ឧត្តមប្រឹក្សាផ្ទាល់ព្រះមហាក្សត្រ និងជាអ្នកតំណាងរាស្រ្តមណ្ឌលបន្ទាយមានជ័យ, លោក ប្លែក វ៉ារី ប្រធានក្រុមប្រឹក្សាខេត្ត និងលោក អ៊ុំ រាត្រី អភិបាលខេត្តបន្ទាយមានជ័យ ប្រារព្ធធ្វើឡើងនៅបរិវេណសាលាខេត្តបន្ទាយមានជ័យ នាព្រឹកថ្ងៃទី១៣ ខែមីនា ឆ្នាំ២០២៦។

សម្តេចក្រឡាហោម ស ខេង ក៏បានថ្លែងអំណរគុណដល់ទឹកចិត្តដ៏អង់អាចក្លាហានរបស់កងកម្លាំង និងការគោរពដឹងគុណចំពោះវីរៈភាពដ៏អង់អាចក្លាហាន កិច្ចខិតខំប្រឹងប្រែងរបស់វីរៈកងទ័ពទាំងអស់ ដែលបានលះបង់ ក្នុងកិច្ចការពារបុព្វហេតុជាតិ មាតុភូមិ ការពារទឹកដីពីការឈ្លានពានរបស់សត្រូវប្រទេសជិតខាងនាពេលកន្លងមក។ សម្តេចក៏បានបញ្ជាក់ផងដែរថា កម្ពុជាមិនដែលមានមហិច្ឆតាឈ្លានពានទឹកដីរបស់ប្រទេសជិតខាងណាមួយនោះទេ កម្ពុជាជាប្រទេសតូច ហេីយកម្ពុជាត្រូវការ តែសន្តិភាពប៉ុណ្ណោះ។

សម្តេចក្រឡាហោម ស ខេង បានសម្តែងនូវការគាំទ្រលើគោលការណ៍ដឹកនាំរបស់រាជរដ្ឋាភិបាល ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី លើការដឹកនាំ និងការដោះស្រាយលេីបញ្ហាព្រំដែនដោយសន្តិវិធី ដើម្បីឲ្យប្រជាពលរដ្ឋឆាប់បានវិលត្រឡប់ទៅលំនៅឋានវិញ និងបន្តរួមចំណែក ក្នុងការជួយឧបត្ថម្ភអ្វីដែលអាចធ្វើទៅបាន ដើម្បីជួយសម្រាលដោយការលំបាករបស់ជនភៀសសឹក។

សូមជម្រាបថា សម្រាប់ខេត្តបន្ទាយមានជ័យ ប្រជាពលរដ្ឋចំនួនជាង២ពាន់ខ្នងត្រូវបានបំផ្លាញ និងភូមិចំនួន៦ ត្រូវបានកងទ័ពថៃ ដាក់កុងតឺន័រ និងរាយបន្លាលួសហ៊ុំព័ទ្ធបន្តគ្រប់គ្រងទាំងកម្រោល ក្នុងដែនអធិបតេយ្យភាពរបស់កម្ពុជា មានប្រជាពលរដ្ឋជាង៣០០០គ្រួសារ ស្មើនឹងមនុស្សរាយចំនួន១១ម៉ឺននាក់ រួមទាំងកុមារព្រះសង្ឃមិនអាចវិលត្រលបទៅលំនៅឋាន និងទីអារាមបាន៕