កាកបាទក្រហមកម្ពុជា រៀបចំកម្មវិធីបរិច្ចាគឈាម នៅទីស្នាក់កណ្ដាលកាកបាទក្រហមកម្ពុជា ដោយមានការចូលរួមពីមហាជន ប្រមាណ៥០០នាក់

ភ្នំពេញ)៖ កាកបាទក្រហមកម្ពុជា នៅព្រឹកថ្ងៃទី២៣ ខែមិថុនា ឆ្នាំ២០២៥ បានសហការជាមួយមជ្ឈមណ្ឌលជាតិផ្ដល់ឈាមនៃក្រសួងសុខាភិបាល រៀបចំកម្មវិធីបរិច្ចាគឈាម ក្រោមប្រធានបទ «បរិច្ឆាគឈាម ផ្តល់ក្តីសង្ឃឹម កសាងសន្តិភាព»

ដែលប្រព្រឹត្ដទៅក្រោមអធិបតីភាពលោកស្រី ពុំ ចន្ទនី អគ្គលេខាធិការកាកបាទក្រហមកម្ពុជា នាទីស្នាក់ការកណ្ដាលកាកបាទក្រហមកម្ពុជា។

ពិធីខាងលើនេះមានការអញ្ជើញចូលរួមពីលោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្ដល់ឈាម ក្រសួងសុខាភិបាល,ថ្នាក់ដឹកនាំ មន្ត្រីបុគ្គលិកទីស្នាក់ការកណ្តាល មន្រ្តីបុគ្គលិកនៃមជ្ឈមណ្ឌលជាតិផ្តល់ឈាម សប្បុរសជន សាស្ត្រាចារ្យ ទីប្រឹក្សាយុវជន និងយុវជនកាកបាទក្រហមកម្ពុជា ប្រចាំសាកលវិទ្យាល័យទាំង ២៥ក្នុងរាជធានីភ្នំពេញ សរុប៥០០នាក់ និងអ្នកដែលបានចូលរួមបរិច្ចាគឈាម ១៩៥នាក់ ដោយទទួលបានឈាមចំនួន ១៦០ប្លោក ក្នុងនោះបុរស ៨៧នាក់ និងនារី ៧៣នាក់។

លោកស្រី ពុំ ចន្ទីនី បានថ្លែងថា ក្រោមម្លប់ដ៏ឧត្តុង្គឧត្តម សម្តេចព្រះមហាក្សត្រី ព្រះវររាជមាតាជាតិខ្មែរ គង់ប្រថាប់ជាព្រះប្រធានកិត្តិយស និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន លោកទាំងទ្វេរយកព្រះទ័យ លោកទាំងទ្វេតែងតែយកព្រះទ័យ យកចិត្តទុកដាក់ចំពោះ កម្លាំងយុវជន និងអ្នកស្ម័គ្រចិត្តកាកបាទក្រហមកម្ពុជា ដែលជាកម្លាំងចលករ/ឆ្អឹងខ្នងរបស់សមាគមជាតិកាកបាទក្រហមកម្ពុជា ដោយជំរុញ និងបណ្ដុះនូវឆន្ទៈផ្នត់គំនិត បំពេញការងារស្ម័គ្រចិត្តដោយ មិនគិតប្រយោជន៍តបស្នងវិញស្របតាមគោលការណ៍គ្រឹះទាំង៧របស់ចលនា និងអនុវត្តតាមយុទ្ធសាស្ដ្រ ២០២១-២០៣០ របស់កាកបាទក្រហមកម្ពុជា ដែលមានវិស័យអាទិភាពចំនួន៤ ក្នុងនោះវិស័យជាអាទិភាព សុខភាព និងការថែទាំសុខភាពក្នុងសហគមន៍ ដោយគោលដៅរួមចំណែកជាមួយរាជរដ្ឋាភិបាលកាត់បន្ថយ អត្រាឈឺ និងស្លាប់នៃមាតា ទារក និងកុមារ, ការពារ និងលុបបំបាត់ ជំងឺឆ្លង មិនឆ្លង, អន្ដរាគមន៍សុខភាព គ្រាអាសន្ន, សុខភាពមនុស្សចាស់ សង្គ្រោះបឋម និងលើកកម្ពស់សុខភាពបឋម។

ការចូលបរិច្ចាគឈាមនាពេលនេះ មិនត្រឹមតែផ្តល់ការលើកទឹកចិត្តដល់អ្នកបរិច្ចាគឈាមតែប៉ុណ្ណោះទេ ថែមទាំងផ្សព្វផ្សាយពីការយល់ដឹង និងសារៈសំខាន់នៃការបរិច្ចាគឈាមជាប្រចាំ ដើម្បីជួយសង្គ្រោះ ជីវិតនិងការលើកកម្ពស់ការយល់ដឹងពីវិជ្ជាសង្រ្គោះបឋម សហគមន៍មានសុខភាពល្អ និងមានភាពធន់ នឹងអាកាសធាតុ ថែមទៀតផង។ ជាក់ស្តែងប្រធានបទ «បរិច្ចាគឈាម ផ្តល់ក្តីសង្ឃឹម កសាងសន្តិភាព» បង្ហាញឱ្យឃើញពីភាពមនុស្សធម៌ ក្តីមេត្តាករុណា និងទស្សនៈសន្តិភាពរបស់យើងទាំងអស់គ្នា។ ឈាមមួយប្លោក អាចជួយរក្សាជីវិតមនុស្ស៣នាក់។ ហើយការបរិច្ចាគរបស់យើងម្នាក់ៗ មិនត្រឹមជាការផ្តល់ឈាមប៉ុណ្ណោះទេ ប៉ុន្តែជាការផ្តល់ក្តីសង្ឃឹមដល់អ្នកជំងឺដែលកំពុងរង់ចាំ។

លោកស្រីអគ្គលេខាធិការកាកបាទក្រហមកម្ពុជា បានថ្លែងទៀតថា នៅពេលដែលមនុស្សម្នាក់ទទួលបានឱកាសរស់រានមានជីវិតឡើងវិញ គឺជាសញ្ញានៃការកសាងសន្តិភាពក្នុងសហគមន៍ និងសង្គមទាំងមូល។ លើសពីនេះទៅទៀត អ្នកបរិច្ចាគឈាម នឹងទទួលបានអត្ដប្រយោជន៍៦យ៉ាងដូចជា កាត់បន្ថយជំងឺមហារីកនានា, កាត់បន្ថយកូលេស្តេរ៉ុល និងភាពតានតឹងក្នុងចិត្ត, កាត់បន្ថយការដាច់សរសៃឈាមខួរក្បាល, កាត់បន្ថយកំហាប់ឈាម និងលើសជាតិដែកដែលធ្វើឲ្យប៉ះពាល់ដល់ថ្លើមនិងលំពែង, ជួយឲ្យប្រសើរឡើងនូវសុខភាពបេះដូងនិងកាត់បន្ថយការឡើងទម្ងន់មនុស្សធ៌មប្រកបដោយសុឆន្ទៈក្នុងការជួយសង្រ្គោះជីវិតអ្នកជំងឺ។

ក្នុងឱកាសនោះលោកស្រីបានថ្លែងអរគុណចំពោះទឹកចិត្ដដ៏ធំធេងរបស់លោកគ្រូ អ្នកគ្រូ សិស្សនិស្សិត មន្ដ្រី បុគ្គលិក និងយុវជនកាកបាទក្រហមកម្ពុជា ដែលបានចូលរួមបរិច្ចាគឈាមនៅថ្ងៃនេះ ដែលមានចំនួនច្រើន តែក្នុងនោះដោយសារមានយុវជនយើងខ្លះមិនត្រូវតាមលក្ខខណ្ឌរបស់ក្រសួងសុខាភិបាល ដោយមិនទាន់គ្រប់ចំនួនថ្ងៃអាចបរិច្ចាគឈាមបាន និងខ្លះទៀតមានបញ្ហាសុខភាពបន្ដិចបន្ដួច ដូច្នេះជាលទ្ធផលអ្នកស្ម័គ្រចិត្ដបរិច្ចាគឈាមនាថ្ងៃនេះ មិនបានទាំងអស់គ្នានោះទេ។

សម្រាប់លោកគ្រូ អ្នកគ្រូ និងនិស្សិតដែលបានបរិច្ចាគឈាមដោយស្ម័គ្រចិត្ដបានលើកឡើងថា ដោយដើរតាមគំរូវីរៈភាពរបស់អ្នកម្ដាយមនុស្សធម៌ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានធ្វើឱ្យយុវជនមានឱកាសចូលរួមចំណែកក្នុងការបំពេញការងារមនុស្សធម៌ ជួយដល់ជនងាយរងគ្រោះ និងងាយរងគ្រោះបំផុតគ្រប់រូបភាព និងគ្រប់ទីកន្លែង ពិសេសសម្រាប់ការផ្ដល់ឈាមនាពេលនេះ គឺកាន់តែបង្ហាញពីការចែករំលែកក្ដីស្រលាញ់ ជួយយកអាសារ ពិសេសការជួយអាយុជីវិត ក្នុងនាមជាកូនខ្មែរដូចគ្នា ដោយមិនប្រកាន់ពូជសាសន៍ ពណ៌សម្បុល អ្វីនោះឡើយ ដែលធ្វើឱ្យលោកគ្រូ អ្នកគ្រូ និងយុវជនទាំងអស់សប្បាយចិត្ដជាខ្លាំង។

ត្បិតណាស់ថាក្រោមការខិតខំប្រឹងប្រែងក្រៀរគររបស់កាកបាទក្រហមកម្ពុជា ឱ្យមានអ្នកចូលរួមបរិច្ចាគឈាមកើនឡើងពីមួយឆ្នាំទៅមួយឆ្នាំ ប៉ន្ដែចំនួននេះ មិនទាន់មានការឆ្លើយតបទៅនឹងតម្រូវនោះទេ ដោយក្នុងឆ្នាំ២០២៤កន្លងមក គឺត្រូវការឈាមមួយប្លោកដើម្បីជួយសង្គ្រោះជីវិតអ្នកជំងឺរៀងរាល់៥នាទីម្តង។ ហើយតម្រូវការឈាមប្រចាំថ្ងៃជាមធ្យម ៣៥០ប្លោកនៅ រាជធានីភ្នំពេញ, សម្រាប់តម្រូវការទូទាំងប្រទេសមានប្រមាណជិត ១៧៩,៣៣២ប្លោក ក្នុងនោះមជ្ឈមណ្ឌលជាតិផ្តល់ឈាមបានគ្របដណ្តប់ជាង៧៥% នៃការផ្គត់ផ្គង់ឈាមទូទាំងប្រទេសតែប៉ុណ្ណោះ។

ការទទួលអំណោយឈាម តាមរយៈសប្បុរសជនដោយស្ម័គ្រចិត្ត និងមិនទទួលកម្រៃឆ្លើយតបបានតែ ២២.១% នៃតម្រូវការក្នុងប្រទេសយើងតែប៉ុណ្ណោះ ជាលទ្ធផលមួយមិនទាន់ល្អប្រសើរនៅឡើយ។ នេះបើតាមការបញ្ជាក់របស់លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាមនៃក្រសួងសុខាភិបាលកម្ពុជា។

ដូច្នេះក្នុងឱកាសនេះ លោកក៏អំពាវនាវបន្ថែមដល់ប្រជាពលរដ្ឋយើង ចូលរួមផ្ដល់ឈាមដោយស្ម័គ្រចិត្ដ ដោយការផ្ដល់ឈាម មិនត្រឹមតែមិនប៉ះពាល់ដល់សុខភាពនោះទេ តែថែមទាំងផ្ដល់អត្ថប្រយោជន៍ជាច្រើនដល់សុខភាព ដូចជាដឹងពីស្ថានភាព និងសុខភាពរបស់ខ្លួន ពិសេសជួយកាត់បន្ថយហានិភ័យនៃជំងឺមិនឆ្លងៗច្រើនទៀត៕