សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានចាត់សហការីនាំយកថវិកា ១០លានរៀលចូលរួមរំលែកទុក្ខសពតារាចម្រៀង ប្រពៃណីលោក ឈឺន ឃីម
កំពងស្ពឺ)៖ នៅព្រឹកថ្ងៃទី១៩ ខែតុលា ឆ្នាំ២០២៥នេះ សម្ដេចកិត្តិព្រឹទ្ធបណ្ឌិតបានចាត់សហការីលោក ស្រួល សុខជា ព្រមទាំងក្រុមកាងារ បាននាំថវិកា ១០លានរៀលចូលរួមរំលែកទុក្ខគ្រួសារសពតារាចម្រៀង ប្រពៃណីលោកបង ឈឺន ឃីម នៅភូមិព្រីងទឹក ឃុំរកាកោះ ស្រុកគងពិសី ខេត្តកំពង់ស្ពឺ
ក្នុងវេលាដ៏សែនក្ដុកក្ដួលនេះ លោក ស្រួល សុខជា បាននាំនូវការផ្តាំផ្ញើរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចូលរួមសម្តែងនូវសមានទុក្ខដ៏ក្រៀមក្រំ ដោយសេចក្តីសោកស្តាយ ស្រណោះអាឡោះអាល័យពន់ពេក ជាមួយនឹងលោក លោកស្រី ចំពោះការបាត់បង់កូនជាទីស្រឡាញ់ ដែលប្រកបដោយកតញ្ញូតាធម៌ និងបានប្រកាន់ខ្ជាប់នូវគុណធម៌ ចរិយាធម៌ ប្រណិប័តន៍ចំពោះ ឪពុក ម្តាយ ក្រុមគ្រួសារ ព្រមទាំងមិត្តភក្តិ ញាតិសន្តានទាំងអស់។ ការលាចាករបស់លោក ឈឺន ឃីម ជាការបាត់បង់នូវពលរដ្ឋកម្ពុជាដ៏ល្អមួយរូប ដែលជាធនធានមនុស្សដ៏សំខាន់ក្នុងការ កសាងមូលដ្ឋានគ្រឹះក្នុងកិច្ចអភិវឌ្ឍជាតិ មាតុភូមិ។
ជាមួយគ្នានេះលោកក៏បាននាំយកថវិកាផ្ទាល់របស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចំនួននាំ១០លានរៀល និងសម្ភារៈមួយចំនួនរួមមាន៖ ទឹកក្រូច ១៥ កេស ទឹកផ្លែរឈើ ៥កេស ត្រីខ១ កេសធំ កាកាវ ១កេស ទឹកដោះគោខាប់មួយកេស ស្ករស៥គីឡូ មីង១កេះធំ តែ ៣គីឡូ មៀនកំប៉ុងមួយកេះ ទឹកសុទ្ធ១០កេស ព្រមទាំងសម្ភារៈជាមួយចំនួនទៀតផងដែរ។
តំណាងកាកបាទក្រហមកម្ពុជា លោកសូមឧទ្ទិសបួងសួងដល់ដួងវិញ្ញាណក្ខន្ធ លោក ឈឺន ឃីម ដែលជាតារាចម្រៀង ប្រពៃណីសូមលោកបានទៅកាន់សុគតិភពកុំបីឃ្លៀងឃ្លាតឡើយ៕