សម្តេចពិជ័យសេនា ទៀ បាញ់ បកស្រាយន័យ «អរគុណសន្តិភាព! អរគុណនយោបាយឈ្នះឈ្នះ! ដឹងគុណស្ថាបនិក មគ្គុទ្ទេសក៍ឯក និងប្រតិបត្តិករ នយោបាយឈ្នះឈ្នះ ដែលនាំមកនូវសន្តិភាព និងការឯកភាពជាតិពេញលេញ»
(ត្បូងឃ្មុំ)៖ សម្តេចពិជ័យសេនា ទៀ បាញ់ អនុប្រធានគណបក្សប្រជាជនកម្ពុជា និងជាឧត្តមប្រឹក្សាផ្ទាល់ព្រះមហាក្សត្រ ហើយក៏ជាប្រតិបត្តិករមួយរូបនៃនយោបាយឈ្នះឈ្នះ នៅព្រឹកថ្ងៃទី២០ ខែមិថុនា ឆ្នាំ២០២៦នេះ បានបកស្រាយន័យនៃពាក្យស្លោក «អរគុណសន្តិភាព! អរគុណនយោបាយឈ្នះឈ្នះ! ដឹងគុណស្ថាបនិក មគ្គុទ្ទេសក៍ឯក និងប្រតិបត្តិករ នយោបាយឈ្នះឈ្នះ ដែលនាំមកនូវសន្តិភាព និងការឯកភាពជាតិពេញលេញ» ដោយអំពាវនាវឲ្យអានពាក្យស្លោកនេះឲ្យបានពេញលេញ ដើម្បីយល់ពីអត្ថន័យ និងគោលបំណងដែលចង់សំដៅ។
ការបកស្រាយរបស់សម្តេចពិជ័យសេនា ទៀ បាញ់ បានធ្វើឡើងក្នុងឱកាសប្រារព្ធខួបអនុស្សាវរីយ៍លើកទី៤៩ នៃទិវាចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧-២០ មិថុនា ២០២៦) និងខួបលើកទី៤៨ នៃការបង្កើតកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា (១២ ឧសភា ១៩៧៨-១២ ឧសភា ២០២៦)។
សម្តេចពិជ័យសេនា ទៀ បាញ់ មានប្រសាសន៍យ៉ាងដូច្នេះថា «អរគុណសន្តិភាព! អរគុណនយោបាយឈ្នះឈ្នះ ! ដឹងគុណស្ថាបនិក មគ្គុទ្ទេសក៍ឯក និងប្រតិបតិ្តករ នយោបាយ ឈ្នះ ឈ្នះ ដែលនាំមកនូវសន្តិភាព និងការឯកភាពជាតិពេញលេញ […] បានន័យថា យើងបានដឹងគុណ អ្នកស្ថាបនិក អ្នកចងក្រងរៀបរៀងឡើងនូវសន្តិភាព និងនយោបាយឈ្នះឈ្នះ ដែលយើងបានដឹងហើយថា គ្មានអ្នកណានោះទេ ក្រៅពីសម្ដេចតេជោនេះឯង»។
បើតាមប្រសាសន៍របស់សម្តេចពិជ័យសេនា ទៀ បាញ់, ពាក្យស្លោក «អរគុណសន្តិភាព» និង «អរគុណនយោបាយឈ្នះឈ្នះ» គឺជាពាក្យដែលប្រជាពលរដ្ឋបានយល់ច្បាស់រួចមកហើយ។ ចំណែកឯឃ្លា «ដឹងគុណស្ថាបនិក មគ្គុទ្ទេសក៍ឯក» មានន័យសំដៅលើបុគ្គលដែលបានផ្តួចផ្តើម បង្កើត និងដឹកនាំការអនុវត្តនយោបាយឈ្នះឈ្នះ រហូតនាំមកនូវសន្តិភាព និងការឯកភាពជាតិពេញលេញ។
សម្តេចពិជ័យសេនា ទៀ បាញ់ គូសបញ្ជាក់ថា តាមន័យនៃពាក្យស្លោកនេះ «ស្ថាបនិក មគ្គុទ្ទេសក៍ឯក» គឺសំដៅលើសម្តេចតេជោ ហ៊ុន សែន ដែលជាអ្នកបង្កើត និងរៀបចំនយោបាយឈ្នះឈ្នះ ដោយមិនចាំបាច់លើកឈ្មោះដោយផ្ទាល់នោះទេ ព្រោះឃ្លានេះបានបញ្ជាក់ន័យរួចជាស្រេច។
ជាមួយគ្នានេះ សម្តេចពិជ័យសេនា ទៀ បាញ់ បានបញ្ជាក់ថា ឃ្លា «និងប្រតិបត្តិករ នយោបាយឈ្នះឈ្នះ ដែលនាំមកនូវសន្តិភាព និងការឯកភាពជាតិពេញលេញ» ក៏មានសារៈសំខាន់ដូចគ្នា ដោយសំដៅដល់អ្នកដែលបានចូលរួមអនុវត្តនយោបាយនេះឲ្យទទួលបានជោគជ័យ។
ជាមួយនឹងការបកស្រាយនេះ សម្តេចពិជ័យសេនា ទៀ បាញ់ បានអំពាវនាវឲ្យថ្នាក់ដឹកនាំ មន្ត្រី និងប្រជាពលរដ្ឋ អានពាក្យស្លោកខាងលើឲ្យបានពេញលេញ ដើម្បីឆ្លុះបញ្ចាំងនូវអត្ថន័យទាំងមូល និងការរំលឹកដល់ទាំង «ស្ថាបនិក មគ្គុទ្ទេសក៍ឯក» និង «ប្រតិបត្តិករ» នៃនយោបាយឈ្នះឈ្នះ ដែលនាំមកនូវសន្តិភាព និងការឯកភាពជាតិពេញលេញសម្រាប់កម្ពុជា៕