សម្តេចពិជ័យសេនា ទៀ បាញ់៖ ការបំបែកបំបាក់មិត្តភាព កម្ពុជា-វៀតណាម គឺតែងតែបរាជ័យ 

(ភ្នំពេញ)៖ សម្តេចពិជ័យសេនា ទៀ បាញ់ អនុប្រធានគណបក្សប្រជាជនកម្ពុជា និងឧត្តមប្រឹក្សាផ្ទាល់ព្រះមហាក្សត្រ នៅថ្ងៃទី២០ ខែមិថុនា ឆ្នាំ២០២៦នេះ បានលើកឡើងថា ការបំបែកបំបាក់មិត្តភាព កម្ពុជា-វៀតណាម គឺតែងតែបរាជ័យ ហើយអ្នកដែលតែងតែបំបែកបំបាក់មិត្តភាពកម្ពុជា-វៀតណាមនោះ មិនបានរស់នៅក្នុងប្រទេសកម្ពុជាឡើយ។

ការលើកឡើងបែបនេះ ធ្វើឡើងក្នុងខួបអនុស្សាវរីយ៍លើកទី ៤៩ឆ្នាំ ទិវានៃការចងចាំដំណើរឆ្ពោះ ទៅការផ្តួលរំលំរបបប្រល័យ ពូជសាសន៍ ប៉ុល ពត (២០ មិថុនា ១៩៧៧ – ២០ មិថុនា ២០២៦) និងខួបលើកទី៤៨ ថ្ងៃបង្កើតកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា (១២ ឧសភា ១៩៧៨ – ១២ ឧសភា ២០២៦)។

សម្តេច ទៀ បាញ់ បានបញ្ជាក់យ៉ាងដូច្នេះថា «ការបំបែកបំបាក់រវាងកម្ពុជា-វៀតណាម គឺគ្មានអ្នកណាមកធ្វើឲ្យបែកបាក់បានទេ អ្នកទាំងនោះសុទ្ធសឹងតែស្ថិត ក្នុងការបរាជ័យទាំងអស់ជាបន្ដបន្ទាប់»។

សម្តេច ទៀ បាញ់ បានលើកឡើងថា អ្នកដែលគ្មានដីនៅខ្មែរ ដែលនិយាយមិនដឹងកតញ្ញូ មិនដឹងគុណូបការៈរបស់អ្នកដឹកនាំ ដែលនាំប្រទេសជាតិមកដល់បច្ចុប្បន្ននេះ ដូច្នេះអ្នកទាំងនោះ មិនមានដីដើម្បីកប់ខ្មោចទេ សូមស្លាប់នៅដីគេចុះ ព្រោះបើមកវិញ ក៏មិនមែនស្រួលប៉ុន្មានដែរ។

បន្ថែមពីនោះទៀត សម្តេច ទៀ បាញ់ បានគូសបញ្ជាក់ថា ប្រជាជនដែលរស់រានមានជីវិត គឺដឹងគុណូបការៈរបស់កងទ័ពស្ម័គ្រចិត្ដវៀតណាម និងគុណូបការៈដ៏ធំធេងបំផុតរបស់សម្ដេចតេជោ ហ៊ុន សែន ដែលបានពាលីកម្មគ្រប់បែបយ៉ាងទាំងអស់ សម្រាប់ប្រទេសជាតិ។

សូមជម្រាបថា ការប្រារព្ធទិវានៃការចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត នៅឆ្នាំ២០២៦នេះ ត្រូវបានរៀបចំយ៉ាងអឹកអធិក មានការអញ្ជើញទៅដាក់កម្រងផ្កាពីអាជ្ញាធរគ្រប់រាជធានី-ខេត្ត ភ្ញៀវអន្តរជាតិ ព្រមទាំងថ្នាក់ដឹកនាំមកពីគ្រប់ក្រសួង ស្ថាប័ន និងមហាជនជាច្រើនរយនាក់។

ឱ្យតែដល់ថ្ងៃទី២០ ខែមិថុនា អ្នកប្រវត្តិសាស្រ្ត រួមទាំងប្រជាជនកម្ពុជាទូទៅ តែងនឹកឃើញទៅដល់ថ្ងៃ ដែលសមមិត្តដ៏ស្មោះស្ម័គ្រនឹងគ្នា៥រូប រួមមានសមមិត្ត ហ៊ុន សែន សមមិត្ត នុច ថន សមមិត្ត ញឹក ហួន សមមិត្ត វ៉ា ប៉ោអ៊ាន និងសមមិត្ត ស៊ូ គីម ស្រ៊ាង (ហៅសាញ់) បានសម្រេចចិត្តធ្វើដំណើររួមគ្នាទាំងយប់ចេញពីតំបន់មួយ ក្នុងស្រុកមេមត់ ខេត្តត្បូងឃ្មុំ ឆ្ពោះទៅទិសខាងកើត ដើម្បីស្វែងរកជំនួយមករំដោះប្រជាជនកម្ពុជា ដែលរស់នៅក្រោមរបបយង់ឃ្នងខ្មែរក្រហម។

កាលនោះសមមិត្ត ហ៊ុន សែន ក្នុងវ័យ ២៥ឆ្នាំ រួមនឹងយុទ្ធមិត្តដ៏ស្ម័គ្រស្មោះ ៤រូបផ្សេងទៀត បានសម្រេចចិត្តក្នុងស្ថានភាពដ៏តានតឹងបំផុតលាចាកទឹកដី លាចាកឧត្តមភរិយា និងកូនក្នុងផ្ទៃ ជាទីស្រឡាញ់ បានធ្វើដំណើរជ្រែកស្បៃរាត្រីឆ្លងកាត់ព្រំដែនទាំងគ្រោះថ្នាក់បំផុត ឆ្ពោះទៅកាន់ប្រទេសវៀតណាម ដើម្បីស្វែងរកគាំទ្រក្នុងការរំដោះជាតិ និងប្រជាជនកម្ពុជា ចេញពីក្រញាំបិសាចដ៏សែនឃោរឃៅ ប៉ុល ពត ដែលកំពុងកាន់អំណាច ហើយបាននិងកំពុងបន្តការកាប់សម្លាប់ប្រជាពលរដ្ឋខ្មែរស្លូតត្រង់។

រាត្រីកាលពី៤៩ឆ្នាំមុន ផ្តើមចេញពីទីតាំងកោះថ្ម ក្នុងឃុំទន្លូង ស្រុកមេមត់ អតីតខេត្តកំពង់ចាមនេះហើយ ដែលបានជួយកែវាសនាអនាគតនៃប្រទេសកម្ពុជា ក្នុងការជួយជំរុញការផ្លាស់ប្តូរមុខមាត់របស់ប្រទេសជាតិកម្ពុជា នៅលើឆាកអន្តរជាតិយ៉ាងខ្លាំងក្លាគួរឱ្យកត់សម្គាល់៕