អុសឈើរាប់សិបម៉ែត្រគូបកាប់ដឹកជញ្ជូនជារៀងរាល់ថ្ងៃដោយសារតែមានឈ្មួញដែលល្បីល្បាញមានឈ្មោះថាចែមុំៗ បានកំពុងប្រមូលទិញទាំងអុសស្រុកពិសេសអុសព្រៃដោយមិនខ្វល់អំពីការបាត់បង់ផលប៉ះពាល់អនុផលព្រៃឈើដែលត្រូវបានរក្សាការពារដោយជម្រកបរិស្ថាន ខណះមន្ត្រីមានសមត្ថកិច្ចជំនាញហាក់ដូចជាមិនបានដឹងទាល់តែសោះ! (វគ្គ១)!
ខេត្តកំពត និងកំពង់ស្ពឺ :យោងតាមប្រភពព័ត៌មានដែលត្រូវបានផ្ដល់ជាយូរថ្ងៃខែរហូតមកដល់បច្ចុប្បន្ននេះគិតត្រឹមថ្ងៃទី១៧ ខែមិថុនា ឆ្នាំ២០២៦ ដើម្បីធ្វើការពិនិត្យស្រាវជ្រាវស៊ើបអង្កេត ផ្សព្វផ្សាយជុំវិញករណីឈ្មួញដែលរកស៊ីដឹកជញ្ជូនទិញអុសដើម្បីដឹកតាមរថយន្តប្រភេទ V1 ជាច្រើនគ្រឿងទាំងថ្ងៃឬយប់ដែលស្ថិតនៅក្នុងតំបន់មួយចំនួនដូចជានៅតាមបណ្តោយផ្លូវលេខ៤៣ ស្ថិតនៅក្នុងភូមិសាស្ត្រស្រុកភ្នំស្រួចនៃខេត្តកំពង់ស្ពឺ ឆ្ពោះទៅឃុំតាកែននៃស្រុកឈូក ខេត្តកំពត។
ជាក់ស្ដែងកន្លងមករហូតមកដល់ថ្ងៃទី១៦ ខែមិថុនា ឆ្នាំ២០២៦ មានរថយន្តមួយចំនួនបានធ្វើការដឹកជញ្ជូនអុសព្រៃលាយឡំនិងអុសក្នុងស្រុកដើម្បីបំភាន់ភ្នែកសាធារណះជន។
ពលរដ្ឋដែលជាអ្នកដឹកជញ្ជូនតាមគោយន្តមួយចំនួនបានបញ្ជាក់ប្រាប់អំពីការទិញអុសឈើព្រៃរបស់ពួកគេដែលមួយថ្ងៃៗពួកគេព្យាយាមធ្វើការកាប់ព្រៃឈើក្នុងតំបន់មួយចំនួនដើម្បីសម្រាប់លក់ឲ្យឈ្មួញដែលមានឈ្មោះថាចែមុំ ដោយប្ដូរនឹងលុយជាថ្នូរសម្រាប់កម្មភាពនេះបើទោះបីជាអំពើខុសច្បាប់ក៏ដោយ។
ជាការពិតកាលពីរាត្រីថ្ងៃទី១៦ ខែមិថុនា ឆ្នាំ២០២៦ យុវជនម្នាក់បានបង្ហើបប្រាប់មកសារព័ត៌មានថារូបគាត់បានចូលកាប់ព្រៃឈើដើម្បីលក់ក្នុងមួយជើងៗចំណេញបានប៉ុន្មានដប់មុឺនរៀលដោយលក់វាស់ម៉ែត្រគូប ធ្វើទាំងអស់នោះមានប្រភេទ ទំពូង សេក។ល។ជាដើម ដោយរូបគាត់ផ្ទាល់បានចូលទៅកាប់នៅក្នុងតំបន់គេជីករ៉ែនៅឯចំណុចភ្នំតាកែវ ស្ថិតនៅក្នុងស្រុកឈូក ខេត្តកំពត ដើម្បីលក់ទៅឱ្យឈ្មួញមួយចំនួន ពិសេសចែមុំនេះតែម្តង ចំណែកឯមន្ត្រីជំនាញមានសមត្ថកិច្ចមិនដែលមានការហាមឃាត់នោះទេ។
ជុំវិញករណីនេះបើយោងតាមការបញ្ជាក់បន្ថែមពីភាគីដែលអាសអាងថាមានឈ្មោះចែមុំបានប្រាប់ដោយរៀបរាប់នៅព្រឹកថ្ងៃទី១៨ ខែមិថុនា ឆ្នាំ២០២៦ថា ខ្លួនគាត់ជាអ្នកទិញអុសពិតប្រាកដមែន តែអុសទាំងអស់នោះមានដើមកាស្យា មានដើមស្វាយចន្ទី ហើយគាត់ក៏ទទួលស្គាល់ថាមានអុសព្រៃលាយឡំខ្លះដែរ តែព្រៃទាំងអស់នោះស្ថិតនៅក្នុងទីតាំងដីក្រុមហ៊ុនរបស់គេទេ បើមិនរួចឆ្នោតទេមិនខ្វះទេកម្លាំងមេព្រៃបរិស្ថានគេឃាត់ហើយ។
តែយ៉ាងណាក៏ដោយយើងនៅតែមិនទាន់ធ្វើការទំនាក់ទំនងបានចំពោះមន្ត្រីជំនាញនៅក្នុងទីតាំងនៅចំណុចទៅស្ថិតនៅក្នុងភូមិសាស្ត្រទាំងពីរគឺស្រុកឈូកនៅខេត្តកំពត និងស្រុកភ្នំស្រួច នៅខេត្តកំពង់ស្ពឺ បាននៅឡើយនោះទេ។
ចំណែកឯមន្ត្រីជំនាញនៅក្នុងតំបន់នីមួយៗហាក់បែរជាមិនអើពើជុំវិញករណីនេះដូចជាមន្ត្រីបរិស្ថាន មន្ត្រីកសិកម្ម រុក្ខាប្រមាញ់ និងនេសាទ ដែលឃើញប្រជាពលរដ្ឋចេញទៅកាប់ព្រៃនៅក្នុងតំបន់មួយចំនួនដែលឋិតនៅក្នុងភូមិសាស្ត្រនៃស្រុកឈូក និងនៅតាមតំបន់ភ្នំខ្លះទៀតជាប់ព្រំប្រទល់នៃស្រុកភ្នំស្រួចខេត្តកំពង់ស្ពឺ ចំពោះការដឹកជញ្ជូននៅតាមដងផ្លូវដែលមន្ត្រីបង្ក្រាបព្រៃឈើហាក់ដូចជាមើលមិនឃើញ។
ប្រភពជាច្រើនបានជម្រាបដំណឹងឲ្យមានការចាត់វិធានការដើម្បីទប់ស្កាត់នៅរាល់ការបំពាបំពានមួយចំនួនចំពោះការរក្សាការពារសម្បត្តិធនធានធម្មជាតិរបស់ប្រទេសកម្ពុជា។
សាធារណជនក៏ដូចជាអង្គការសង្គមស៊ីវិលកំពុងរង់ចាំមើលចំណាត់ការចំពោះទង្វើដែលនាំគ្នាប្រព្រឹត្តការបំផ្លាញព្រៃឈើដែលបង្កឲ្យមានក្តីវិនាសនៅតំបន់ជម្រកព្រៃឈើមួយចំនួនដែលនៅសេសសល់ ហើយបើក្នុងករណីឈើនៅក្នុងតំបន់សម្បទានណាមួយក៏ត្រូវអនុវត្តនីតិវិធីឲ្យបានស្របច្បាប់ដែលបានកំណត់ដោយក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទ ផងដែរ។
អង្គភាពសារព័ត៌មានរបស់យើងធ្វើការផ្សព្វផ្សាយដើម្បីឲ្យមន្ត្រីមានសមត្ថកិច្ចធ្វើការទប់ស្កាត់ការពារថែរក្សាក្នុងទីតាំងស្ថិតនៅក្នុងភូមិសាស្ត្រដែលកំពុងធ្វើសកម្មភាពដូចការលើកឡើងខាងលើស្ថិតនៅក្នុងស្រុកភ្នំស្រួចខេត្តកំពង់ស្ពឺជាប់នឹងស្រុកឈូកខេត្តកំពត។
ហើយយើងនឹងរង់ចាំទទួលប្រភពព័ត៌មានពាក់ព័ន្ធមួយចំនួនបន្ថែមទៀតដើម្បីធ្វើការផ្សព្វផ្សាយជាបន្តផងដែរ សូមអរគុណ..!
