Dr.Tong៖ «ខ្ញុំពិតជាមានអារម្មណ៍កក់ក្តៅ និងរំភើបដែលបានឃើញលោកគ្រូសាស្រ្តាចារ្យទាំងអស់ យកចិត្តទុកដាក់លើវេជ្ជបណ្ឌិតគ្រប់រូប ហើយខិតខំធ្វើយ៉ាងណាឱ្យវិស័យសុខាភិបាលរបស់ខ្មែរយើង កាន់តែមានភាពជឿនលឿន» 

(ភ្នំពេញ)៖ តាមរយៈបណ្ដាញសង្គមរបស់ Dr.Tong ដែលបានបង្ហោះនៅថ្ងៃទី០៤ ខែមិថុនា ឆ្នាំ២០២៦នេះ បានឱ្យដឹងថា Dr.Tong បានជួបសំណេះសំណាលជាមួយថ្នាក់ដឹកនាំគណៈគ្រូពេទ្យកម្ពុជា ក្រោមវត្តមានលោកសាស្រ្តាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល ដែលក្នុងជំនួបនេះ Dr Tong បានសម្តែងនូវសេចក្តីរីករាយ ត្រេកអរដោយបានជួបសំណេះសំណាលជាមួយថ្នាក់ដឹកនាំ តំណាងក្រសួងសុខាភិបាល និងថ្នាក់ដឹកនាំគណៈគ្រូពេទ្យកម្ពុជា ដែលលោកគ្រូៗ សាស្រ្តាចារ្យទាំងអស់ សុទ្ធតែជាសាស្រ្តាចារ្យដែលបានផ្តល់ការអប់រំ បង្ហាត់បង្រៀនច្រើនជំនាន់ថ្នាក់វេជ្ជបណ្ឌិតជាបន្តបន្ទាប់ រួមទាំងរូបលោកផ្ទាល់ផងដែរ។

លោកវេជ្ជបណ្ឌិត និត ប៊ុនតុងយី បានបន្តថា ការជួបសំណេះសំណាលនេះ ប្រៀបដូចជាការជជែកជាមួយក្រុមគ្រួសារវេជ្ជបណ្ឌិត ហើយដែលលោកគ្រូសាស្រ្តាចារ្យបានបង្ហាញអារម្មណ៍ ទឹកចិត្តសប្បាយរីករាយ និងមានមោទនភាពដែលឃើញ អ្នកបន្តជំនាន់ក្រោយៗ ស្រលាញ់ និងខិតខំចូលរួមលើកយកសកម្មភាពចែករំលែកចំណេះដឹង មកជូនដល់ប្រជាពលរដ្ឋ ដែលសកម្មភាពនេះ គឺជាសកម្មភាពមួយដែលវេជ្ជបណ្ឌិតគួរតែខិតខំទាំងអស់គ្នា។ «លើសពីនេះលោកគ្រូៗសាស្រ្តាចារ្យ បានបង្ហាញពីការខិតខំប្រឹងប្រែង ទាំងសុខាភិបាល ទាំងគណៈវិជ្ជាជីវៈទាំងអស់លើកទឹកចិត្តឱ្យយើងខ្ញុំជាពេទ្យ ចូលរួមបន្ថែមទៀតក្នុងការចែករំលែកចំណេះដឹងសុខភាព ដោយប្រកាន់ខ្ជាប់ជាមួយក្រមសីលធម៍ សំដៅសុវត្ថិភាពប្រជាជន ដែលពិតជាសេចក្តីថ្លៃថ្នូរ និង ភាពកក់ក្តៅដែលខ្ញុំបាទ និងគ្រូពេទ្យយើងទទួលបានមកវិញ»។

Dr Tong បានបង្ហាញអារម្មណ៍កក់ក្តៅ និងរំភើបដែលបានឃើញលោកគ្រូសាស្រ្តាចារ្យទាំងអស់ យកចិត្តទុកដាក់លើវេជ្ជបណ្ឌិតគ្រប់រូប ហើយខិតខំធ្វើយ៉ាងណាអោយវិស័យសុខាភិបាលរបស់ខ្មែរយើងនេះ កាន់តែមានភាពជឿនលឿន ត្រឹមត្រូវ តាមការវិវត្តន៍វិទ្យាសាស្ត្រ និងផ្តល់ជូននូវទំនុកចិត្តពេញលេញ ជូនដល់ប្រជាពលរដ្ឋកម្ពុជា៕