ក្រុមហ៊ុនមកពីកូរ៉េខាងត្បូង ចង់វិនិយោគលើវិស័យកសិកម្មកម្ពុជា ពិសេសស្វាយចន្ទី 

(ភ្នំពេញ)៖ លោក Park Joo Bong ប្រធានក្រុមហ៊ុន និងជាប្រធានសភាពាណិជ្ជកម្ម និងឧស្សាហកម្ម ទីក្រុងអ៊ុនឆន់ កូរ៉េខាងត្បូង បានលើកឡើងថា នៅពេលនេះ ក្រុមអ្នកវិនិយោគកូរ៉េខាងត្បូង កំពុងតែស្វែងរកឱកាសបន្ថែមទៀត ដើម្បីវិនិយោគនៅក្នុងប្រទេសកម្ពុជា ជាពិសេសទៅលើវិស័យកសិកម្ម ហើយអ្វីដែលជាការកាត់សម្គាល់សំខាន់នោះ គឺស្វាយចន្ទី។

លោកលើកឡើងបែបនេះ ក្នុងឱកាសសម្តេចតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា អនុញ្ញាតឱ្យថ្នាក់ដឹកនាំក្រុមហ៊ុន DAEJOO KC GROUP របស់កូរ៉េខាងត្បូង ដឹកនាំដោយលោកផ្ទាល់ ចូលជួបសម្តែងការគួរសម និងសូមអានុសាសន៍នានាពាក់ព័ន្ធការវិនិយោគ និងធ្វើពាណិជ្ជកម្ម។ ជំនួបនេះប្រព្រឹត្តទៅនៅវិមានសាមគ្គីភាព នៃព្រឹទ្ធសភាកម្ពុជា នាព្រឹកថ្ងៃអង្គារ ទី២៦ ខែឧសភា ឆ្នាំ២០២៦នេះ។

សម្ដេចតេជោ ហ៊ុន សែន បានសម្ដែងនូវការស្វាគមន៍ចំពោះ លោក Park Joo Bong និងសហការី ដែលបានអញ្ជើញទស្សនកិច្ចនៅក្នុងប្រទេសកម្ពុជា ហើយសង្ឃឹមថាការទស្សនកិច្ចរបស់ក្រុមអ្នកវិនិយោគកូរ៉េខាងត្បូង មកកាន់កម្ពុជានៅពេលនេះ នឹងបានស្វែងរកឱកាសបន្ថែមទៀតនៅក្នុងការវិនិយោគនៅក្នុងប្រទេសកម្ពុជា។

នៅក្នុងឱកាសនោះ លោក Park Joo Bong បានសម្ដែងនូវការអរគុណជាអនេកចំពោះសម្ដេចតេជោ ដែលបានអនុញ្ញាតឲ្យលោក និងក្រុមអ្នកវិនិយោគបានជួបសម្ដែងការគួរសម។ លោក Park Joo Bong បានលើកឡើងនូវទិដ្ឋភាពបរិយាកាសនៃការវិនិយោគនៅក្នុងប្រទេសកម្ពុជា ដោយលោកបានរំលេចចំពោះសម្ដេចតេជោថា ប្រទេសកម្ពុជា គឺជាប្រទេសមួយដែលមានសុវត្ថិភាព ហើយទទួលបានការចាប់អារម្មណ៍ពីអ្នកវិនិយោគរបស់កូរ៉េខាងត្បូង។

លោកបន្តថា នៅពេលនេះក្រុមអ្នកវិនិយោគកំពុងតែស្វែងរកឱកាសបន្ថែមទៀត ដើម្បីវិនិយោគនៅក្នុងប្រទេសកម្ពុជា ជាពិសេសទៅលើវិស័យកសិកម្ម ហើយអ្វីដែលជាការកាត់សម្គាល់សំខាន់នោះ គឺស្វាយចន្ទី។

នៅក្នុងឱកាសនោះ សម្ដេចតេជោ បានសម្ដែងការអរគុណចំពោះការចាប់អារម្មណ៍របស់អ្នកវិនិយោគកូរ៉េខាងត្បូង មកកាន់ប្រទេសកម្ពុជាហើយសម្ដេចតេជោ បានសម្ដែងនូវការពេញចិត្តចំពោះការចាប់អារម្មណ៍ទៅលើការវិនិយោគផ្នែកកសិកម្ម ពោលគឺស្វាយចន្ទី ដែលសម្ដេចតេជោ បានរំលេចថា ប្រទេសកម្ពុជាមាននូវផលិតផលជាច្រើនសម្រាប់ធ្វើការវិនិយោគបន្តទៀត ជាពិសេស គឺផលិតផលកសិកម្ម ដែលជាវត្ថុធាតុដើម។ អ្វីដែលកម្ពុជាត្រូវការបន្ថែមនោះ គឺអ្នកវិនិយោគដែលអាចកែឆ្នៃនូវកសិផលរបស់កម្ពុជា ដើម្បីយកទៅលក់នៅទីផ្សារកូរ៉េផង ហើយជាពិសេស គឺនៅទីផ្សារពិភពលោក។

សម្ដេចតេជោ ហ៊ុន សែន បានសង្កត់ធ្ងន់ថា ចំណុចស្នូលនៃទំនាក់ទំនងរវាងរវាងកម្ពុជានិងកូរ៉េខាងត្បូង គឺពាណិជ្ជកម្មនិងការវិនិយោគនេះឯង ដូច្នេះតាមរយៈក្រុមអ្នកវិនិយោគរបស់កូរ៉េខាងត្បូងមកកាន់ប្រទេសកម្ពុជានៅពេលនេះ នឹងជាឱកាសបន្ថែមទៀត ដើម្បីធ្វើការវិនិយោគនៅក្នុងប្រទេសកម្ពុជា។

ជាមួយគ្នានេះផងដែរ សម្ដេចតេជោបានសង្កត់ធ្ងន់ ទៅលើទំនាក់ទំនងរវាងប្រទេសកម្ពុជានិងកូរ៉េ ដែលពេលនេះជាដៃគូយុទ្ធសាស្រ្តជាមួយគ្នា ហើយសម្ដេចសង្ឃឹមថា ទៅថ្ងៃខាងមុខជាពិសេសនៅក្នុងឱកាសខួប ៣០ ឆ្នាំនៃការបង្កើតទំនាក់ទំនងរវាងកម្ពុជា និងកូរ៉េខាងត្បូងឡើងវិញនោះ គឺប្រទេសទាំងពីរនឹងអាចដើរដល់ជំហានមួយទៀត គឺការបង្កើតជាដៃគូយុទ្ធសាស្ត្រគ្រប់ជ្រុងជ្រោយជាមួយគ្នា៕