សម្តេចតេជោ ហ៊ុន សែន៖ កម្ពុជា និងហុងគ្រី ទោះបីឆ្ងាយគ្នា តែភាពជិតស្និទ្ធ និងបេះដូងនៃការភ្ជាប់ទំនាក់ទំនងនៅតែរឹងមាំ 

(ភ្នំពេញ)៖ សម្តេចតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បានបង្ហាញនូវការពេញចិត្តចំពោះទំនាក់ទំនងដ៏ល្អប្រសើររវាងកម្ពុជា និងហុងគ្រីរយៈពេលពេល៧០ឆ្នាំមកនេះ។ សម្តេចតេជោ បានរំលេចថា កម្ពុជា និងហុងគ្រី ទោះបីមានចម្ងាយឆ្ងាយពីគ្នា តែភាពជិតស្និទ្ធ និងបេះដូងនៃការតភ្ជាប់ទំនាក់ទំនងនៅតែរឹងមាំ។

សម្តេចតេជោ បានគូសរំលេចបែបនេះ ក្នុងឱកាសអនុញ្ញាតឱ្យលោក Tibor Baloghdi ឯកអគ្គរដ្ឋទូតហុងគ្រីប្រចាំនៅកម្ពុជា និងសហការី ចូលជួបសម្តែងការគួរសម និងជម្រាបលា នៅវិមានសាមគ្គីភាពនៃព្រឹទ្ធសភាកម្ពុជា នាព្រឹកថ្ងៃចន្ទ ទី២៥ ខែឧសភា ឆ្នាំ២០២៦នេះ។

លោក ជា ធីរិទ្ធ អ្នកនាំពាក្យព្រឹទ្ធសភាកម្ពុជា បានឱ្យដឹងថា ក្នុងជំនួបនោះសម្ដេចតេជោ ហ៊ុន សែន បានកោតសរសើរចំពោះលោកអគ្គរដ្ឋទូត ក្នុងពេលបំពេញបេសកកម្មជាឯកអគ្គរដ្ឋទូតនៅកម្ពុជា។ សម្ដេចតេជោ បានលើកឡើងថា ទោះបីហុងគ្រី និងកម្ពុជានៅឆ្ងាយពីគ្នាក៏ពិតមែន ប៉ុន្តែទំនាក់ទំនងរវាងប្រទេសទាំងពីរមានភាពជិតស្និទ្ធខ្លាំងណាស់ក្នុងស្ថានភាពនាពេលបច្ចុប្បន្ន។ មកដល់ពេលនេះ ទំនាក់ទំនងរវាងកម្ពុជា និងហុងគ្រី មានអាយុកាល៧០ឆ្នាំហើយ ដែលជាទំនាក់ទំនងមួយដ៏យូរអង្វែង។

ក្នុងឱកាសនោះ លោកឯកអគ្គរដ្ឋទូតហុងគ្រី បានសម្ដែងការអរគុណជាអនេក ដែលសម្ដេចតេជោ បានអនុញ្ញាតឱ្យរូបលោក និងសហការី បានជួបសម្ដែងការគួរសម និងជម្រាបលា។ លោកឯកអគ្គរដ្ឋទូត បានលើកឡើងថា ជាកិត្តិយសសម្រាប់រូបលោក ដែលបានបំពេញការងារជាឯកអគ្គរដ្ឋទូតប្រចាំនៅកម្ពុជា។

លោកឯកអគ្គរដ្ឋទូត បានលើកសរសើរអំពីប្រទេសកម្ពុជា ជាប្រទេសដ៏ស្រស់ស្អាត ហើយមានភាពរីកចម្រើនដែលលោកបានឃើញផ្ទាល់ភ្នែក។ ជាពិសេស គឺជីវភាពរបស់ប្រជាជនមានភាពប្រសើរឡើងជាលំដាប់។

លោកឯកអគ្គរដ្ឋទូត បានលើកឡើងថា ៤ឆ្នាំកន្លងមកនេះ ទំនាក់ទំនងរវាងកម្ពុជា និងហុងគ្រី មានភាពរីកចម្រើន ជាពិសេសការសហការគ្នាទាំងក្របខណ្ឌនៃស្ថាប័ននីតិប្រតិបត្តិ និងស្ថាប័ននីតិបញ្ញត្តិ។ លោកឯកអគ្គរដ្ឋទូត បានអរគុណស្ថាប័នទាំងអស់របស់ប្រទេសកម្ពុជា ដែលបានសហការល្អក្នុងពេលលោកបំពេញការងារនៅកម្ពុជា។

លោកឯកអគ្គរដ្ឋទូត ក៏បានរំលេចថា ប្រទេសទាំងពីរមានការកើនឡើងនូវទំហំពាណិជ្ជកម្ម ជាពិសេសកម្ពុជា បាននាំចូលទៅកាន់ប្រទេសហុងគ្រី មានការកើនឡើងក្នុងរយៈពេលចុងក្រោយនេះ។ លោកឯកអគ្គរដ្ឋទូតសង្ឃឹមថា ទំហំពាណិជ្ជកម្ម ឬកិច្ចសហការផ្នែកសេដ្ឋកិច្ចរវាងកម្ពុជា និងហុងគ្រី កាន់តែរីកចម្រើនតទៅមុខទៀត។

លោកឯកអគ្គរដ្ឋទូត ក៏បានលើកឡើងផងដែរថា ឆ្នាំ២០២៦នេះ ជាខួប៧០ឆ្នាំនៃទំនាក់ទំនងរវាងកម្ពុជា និងហុងគ្រី ហើយប្រទេសទាំងពីរបានរួមគ្នារៀបចំកម្មវិធីអបអរសាទរខួប៧០ឆ្នាំនេះ ដើម្បីឱ្យទំនាក់ទំនងកាន់តែរីកចម្រើនបន្ថែមទៀត។

សម្ដេចតេជោ ហ៊ុន សែន ប្រមុខរដ្ឋស្តីទី បានអរគុណចំពោះការលើកឡើងរបស់លោកឯកអគ្គរដ្ឋទូត ដែលរំលេចអំពីទំនាក់ទំនងដ៏ល្អរវាងកម្ពុជា និងហុងគ្រី។ សម្ដេចតេជោ ក៏បានរំលេចបន្ថែមដែរថា ហុងគ្រី បានចូលរួមចំណែកយ៉ាងសំខាន់ក្នុងការជួយបណ្តុះបណ្ដាលធនធានមនុស្សរបស់កម្ពុជា ដែលមកដល់ពេលនេះ មានថ្នាក់ដឹកនាំកម្ពុជាមួយចំនួន បានទៅសិក្សា និងបញ្ចប់ការសិក្សានៅប្រទេសហុងគ្រី ហើយកំពុងធ្វើការនៅប្រទេសកម្ពុជា។

សម្ដេចតេជោ ក៏បានរំលេចផងដែរថា ហុងគ្រី ជាប្រទេសមួយដែលសម្ដេច ធ្លាប់ទៅបំពេញទស្សនកិច្ចច្រើនក្នុងចំណោមប្រទេសសម្ដេចបានអញ្ជើញបំពេញទស្សនកិច្ចតាំងពីពេលសម្តេចនៅជារដ្ឋមន្ត្រីការបរទេសមកម្ល៉េះ ហើយមានអនុស្សាវរីយ៍ជាច្រើនក្នុងការពង្រីកទំនាក់ទំនង។ មកដល់ពេលបច្ចុប្បន្ន សម្ដេចតេជោ ក៏បានសម្តែងការពេញចិត្តចំពោះទំនាក់ទំនងដ៏រឹងមាំរវាងប្រទេសទាំងពីរ គឺការផ្លាស់ប្តូរទំណើរទស្សនកិច្ចទៅវិញទៅមករវាងថ្នាក់ដឹកនាំនៃប្រទេសទាំងពីរ។

សម្ដេចតេជោ ក៏រំលេចថា កាលពីឆ្នាំ២០១៩កន្លងទៅ សម្ដេចក៏បានអញ្ជើញទៅបំពេញទស្សនកិច្ចនៅប្រទេសហុងគ្រី ហើយក្រោយមកប្រធានាធិបតីរបស់ហុងគ្រី ក៏បានអញ្ជើញមកបំពេញទស្សនកិច្ចនៅប្រទេសកម្ពុជា។ នេះបានឆ្លុះបញ្ចាំងអំពីទំនាក់ទំនងដ៏ស្អិតរមួតរវាងប្រទេសទាំងពីរ បើទោះបីជាឆ្ងាយពីគ្នាយ៉ាងណាក្តី ក៏ប៉ុន្តែភាពជិតស្និទ្ធ និងបេះដូងនៃការភ្ជាប់ទំនាក់ទំនងនេះនៅតែរឹងមាំ៕