សម្តេចតេជោ ហ៊ុន សែន ផ្ញើសារលិខិតចូលរួមអបអរសាទរជូន ប្រធានសភាជាតិសាធារណរដ្ឋប្រជាធិបតេយ្យទីម័រឡេស្តេ ក្នុងឱកាសខួបលើកទី២៤ នៃទិវាបុណ្យជាតិនៃសាធារណរដ្ឋប្រជាធិបតេយ្យទីម័រឡេស្តេ

(ភ្នំពេញ)៖ សម្តេចតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា នាថ្ងៃទី២០ ខែឧសភា ឆ្នាំ២០២៦នេះ បានផ្ញើសាលិខិតសម្តែងនូវការអបអរសាទរយ៉ាងស្មោះសរបំផុត ជូនចំពោះលោកស្រី Maria Fernanda Lay ប្រធានសភាជាតិ សាធារណរដ្ឋប្រជាធិបតេយ្យទីម័រឡេស្តេ ក្នុងឱកាសខួបលើកទី២៤ នៃទិវាបុណ្យជាតិនៃសាធារណរដ្ឋ ប្រជាធិបតេយ្យទីម័រឡេស្តេ។

នៅក្នុងសារលិខិតនេះសម្តេចតេជោ ហ៊ុន សែន បានថ្លែងដូចនេះថា «នៅក្នុងឱកាសខួបលើកទី២៤ នៃទិវាបុណ្យជាតិ នៃសាធារណរដ្ឋប្រជាធិបតេយ្យទីម័រឡេស្តេ ក្នុងនាមព្រឹទ្ធសភានៃព្រះរាជាណាចក្រកម្ពុជា ព្រមទាំងក្នុងនាមរូបខ្ញុំផ្ទាល់ ខ្ញុំសូមអបអរសាទរយ៉ាងកក់ក្តៅបំផុត ជូនចំពោះលោកជំទាវ សភាជាតិ និងប្រជាជនទីម័រឡេស្តជាទីរាប់អាន»។

ខណៈដែលទីម័រឡេស្តេ រំលឹកខួបនៃព្រឹត្តិការណ៍ជាតិដ៏វិសេសនេះ សម្តេចបានសូមសម្តែងនូវការកោតសរសើរចំពោះវឌ្ឍនភាព និងសមិទ្ធផលដ៏គួរឱ្យកត់សម្គាល់ដែលទីម័រឡេស្តេសម្រេចបាន តាម រយៈការដឹកនាំប្រកបដោយចក្ខុវិស័យភ្លឺស្វាង ភាពធន់ និងសេចក្តីប្រាថ្នាដ៏យូរអង្វែងរបស់ប្រជាជន របស់ទីម័រឡេស្តេ។ ប្រទេសកម្ពុជា ផ្តល់តម្លៃខ្ពស់ចំពោះមិត្តភាព និងកិច្ចសហប្រតិបត្តិការជិតស្និទ្ធដែលប្រទេសយើងទាំងពីរ បានពូនជ្រំឡើងក្នុងរយៈពេលប៉ុន្មានឆ្នាំមកនេះ ឈរលើមូលដ្ឋាននៃការគោរពគ្នា ទៅវិញទៅមក សាមគ្គីភាព និងសេចក្តីប្រាថ្នារួមក្នុងតំបន់។

សម្តេចតេជោ ជឿជាក់យ៉ាងមុតមាំថា កិច្ចសហប្រតិបត្តិការរបស់យើង នឹងបន្តរីកចម្រើនកាន់តែស៊ីជម្រៅ និងធំធេង ដើម្បីឧត្តមប្រយោជន៍របស់ប្រជាជនយើងទាំងពីរ។ សម្តេចតេជោ ក៏មានជំនឿជឿជាក់ថា កិច្ចសហប្រតិបត្តិការរវាងស្ថាប័ននីតិប្បញ្ញត្តិរបស់យើងទាំងពីរ នឹងកាន់តែស៊ីជម្រៅថែមទៀត ដែលរួមចំណែកប្រកបដោយអត្ថន័យដល់ការសន្ទនាអន្តរសភា និងកិច្ចសហការស្ថាប័នកាន់តែរឹងមាំក្នុងការគាំទ្រដល់សន្តិភាព ស្ថិរភាព និងការអភិវឌ្ឍប្រកបដោយចីរភាពនៃប្រទេសយើងទាំងពីរ និងតំបន់ទាំងមូល៕