លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ថ្លែងអំណរគុណដល់លោកជំទាវអ្នកឧកញ៉ា ម៉ៅ ចំណាន ដែលបានដឹកនាំសិល្បករ សិល្បការីនី បង្កើតមាតិកាអប់រំ បែបគំនិតវិជ្ជមាន លើកកម្ពស់សីលធម៌សង្គម និងអំពាវនាវឱ្យបន្តបង្កើតមាតិកាឱ្យល្អៗបន្ថែមទៀត

(ភ្នំពេញ)៖ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការសមាគមកាយឫទ្ធិនារីកម្ពុជា និងជាប្រធានកិត្តិយសគណៈកម្មាធិការជាតិ លើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ (គ.ជ.ស.ស.ខ) បានថ្លែងអំណរគុណដល់លោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ ដែលកន្លងមកបានដឹកនាំសិល្បករ សិល្បការីនី បង្កើតមាតិកាមានការអប់រំ ដែលផ្តល់ជាគំនិតវិជ្ជមាន ដើម្បីចូលរួមលើកកម្ពស់សីលធម៌សង្គម។

ជាមួយគ្នានេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអំពាវនាវឱ្យសមាគម ជាពិសេសសិល្បករ សិល្បការនី និងអ្នកបង្កើតមាតិកាតាមបណ្តាណសង្គម (Content Creator) បន្តបង្កើនកិច្ចការងារនេះបន្ថែមទៀត ដើម្បីចូលរួមចំណែកក្នុងការលើកកម្ពស់សីលធម៌សង្គមជាតិយើង។

លោកជំទាវបណ្ឌិត ពេជ ចន្ទមុន្នី មានប្រសាសន៍ដូច្នេះ ក្នុងសន្និបាតបូកសរុបលទ្ធផលការងារឆ្នាំ២០២៤-២០២៥ និងលើកទិសដៅឆ្នាំ២០២៦-២០២៧ របស់គណ:កម្មាធិការជាតិលើកកម្ពស់សីលធ៌មសង្គម តម្លៃស្រ្តី និងគ្រួសារខ្មែរ នៅថ្ងៃទី៥ ខែឧសភា ឆ្នាំ២០២៦ ដោយក្នុងសន្និបាតនេះ លោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ ក៏បានដឹកនាំគណៈប្រតិភូសមាគម អញ្ជើញចូលរួមផងដែរ៕