ក្រសួងការពារជាតិ បើកវគ្គបំប៉នពង្រឹងការអនុវត្ត លក្ខន្តិកៈចំពោះយោធិន និងរំហាត់របៀប នៃកងយុទ្ធពលខេមរភូមិន្ទ

(ភ្នំពេញ)៖ ក្រសួងការពារជាតិ នៅព្រឹកថ្ងៃទី១៨ ខែមីនា ឆ្នាំ២០២៦ បានរៀបចំពិធីបើកវគ្គបំប៉នស្ដីពីការពង្រឹងអនុវត្ត លក្ខន្តិកៈទូទៅចំពោះយោធិន បទវិន័យទូទៅ និងរំហាត់របៀបនៃកងយុទ្ធពលខេមរភូមិន្ទ។

ពិធីនេះបានធ្វើឡើងក្រោមអធិបតីភាពនាយឧត្តមសេនីយ៍ ចាយ សាំងយុន រដ្ឋលេខាធិការប្រចាំការក្រសួងការពារជាតិ តំណាងនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។

លោកឧត្តមសេនីយ៍ឯក គឹម រស្មី អគ្គលេខាធិការរងក្រសួងការពារជាតិ និងជាអនុប្រធានក្រុមការងារដឹកនាំជំរុញការអនុវត្តសេចក្តីណែនាំលេខ០០៣ របស់ក្រសួងការពារជាតិ ក្នុងតាងនាមលោកឧត្តមសេនីយ៍ឯក ច័ន្ទ សុភត្រា រដ្ឋលេខាធិការ ក្រសួងការពារជាតិ និងជាប្រធានក្រុមការងារដឹកនាំជំរុញការអនុវត្តសេចក្តីណែនាំលេខ០០៣ របស់ក្រសួងការពារជាតិ បានឡើងអានរបាយការណ៍ស្វាគមន៍ ស្តីពីការរៀបចំ និងប្រព្រឹត្តទៅរបស់វគ្គបំប៉នពង្រឹងអនុវត្តលក្ខន្តិកៈទូទៅ ចំពោះយោធិន និងបទវិន័យទូទៅ និងលំហាត់របៀបនៃកងយោធពលខេមរភូមិន្ទ គោរពរាយការណ៍ជូនគណៈអធិបតី និងអង្គពិធី។

វគ្គបំប៉ននេះមានរយៈពេល ៣៩ថ្ងៃ ក្នុងនោះសិក្សាទ្រឹស្ដី ចំនួន ២៤ថ្ងៃ និងអនុវត្តជាក់ស្ដែងចំនួន ១៥ថ្ងៃ ដែលមានសិក្ខាកាមចូលរួមចំនួន ៨៦នាក់ និងយោធាចារ្យ ០៧នាក់។ វគ្គបំប៉ននេះធ្វើឡើងសំដៅលើការលើកកម្ពស់ប្រសិទ្ធភាព ក្នុងការដឹកនាំ គ្រប់គ្រង និងបង្កើនសមត្ថភាពប្រតិបត្តិ ជាពិសេសគឺកាត់បន្ថយភាពអសកម្ម កំហុសឆ្គងទៅលើសីលធម៌ បទវិន័យទូទៅ ដែលនាំមកនូវឥទ្ធិពលមិនល្អនៅក្នុងអង្គភាព និងសេចក្តីថ្លៃថ្លៃថ្នូររបស់កងយោធពលខេមរភូមិន។

ជាមួយគ្នានឹងវគ្គបំប៉ននេះ ក្រុមការងារដឹកនាំជំរុញការអនុវត្តសេចក្តីណែនាំលេខ០០៣ បានតាមដាន និងបន្តជំរុញឱ្យតាមបណ្ដាអង្គភាព ចំណុះក្រសួងការពារជាតិ ទទួលខុសត្រូវជាចម្បងក្នុងការដាក់ចេញផែនការហ្វឹកហ្វឺន ពង្រឹងតាមអង្គភាពរៀងៗខ្លួន ឱ្យបានច្បាស់លាស់ កំណត់គោលដៅ វិធានការ និងកាលវិភាគអនុវត្តជាក់ស្ដែងស្របតាមភារកិច្ច និងបរិយាកាសរបស់អង្គភាពនីមួយៗ។

ការងារពង្រឹងនេះ មិនមែនជាការអនុវត្តជាបណ្តោះអាសន្នមួយពេលនោះទេ វាគឺជាមូលដ្ឋានគ្រឹះសំខាន់សម្រាប់បន្តរៀបចំផែនការហ្វឹកហ្វឺនជាប្រព័ន្ធឱ្យមានភាពបន្តបន្ទាប់ និងមានស្តង់ដារតែមួយ ស្របតាមទិសដៅ គោលនយោបាយ និងការណែនាំរបស់ក្រសួងការពារជាតិ លើការពង្រឹងការអនុវត្តលក្ខន្តិកៈ បទវិន័យ លំហាត់របៀប វប្បធម៌ការងារ និងស្មារតីជាប្រចាំថ្ងៃសម្រាប់អង្គភាពទាំងមូល។

ក្នុងពិធីដ៏មានអត្ថន័យនេះ នាយឧត្តមសេនីយ៍ ចាយ សាំងយុន បានកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ក្រុមការងារដឹកនាំជំរុញការអនុវត្តសេចក្តីណែនាំលេខ០០៣ របស់ក្រសួងការពារជាតិ ដែលមានឧត្តមសេនីយ៍ឯក ច័ន្ទ សុភក្រ្តា ដែលកន្លងមកបានដាក់ចេញនូវផែនការ និងសកម្មភាពជាបន្តបន្ទាប់ ដល់បណ្តាអង្គភាពចំណុះក្រសួងការពារជាតិ។ បន្ថែមពីនេះ ក្រុមការងារក៏បានពុះពារសម្រេចបាននូវដំណើរការវគ្គបំប៉ន ដោយអនុវត្តតាមការប្រគល់ភារកិច្ចរបស់ក្រសួងការពារជាតិ ដែលតម្រូវឱ្យមានការរៀបចំវគ្គបំប៉ននេះឡើង ដើម្បីពង្រឹងវិន័យ សណ្ដាប់ធ្នាប់ ក្រមសីលធម៌ ការណ៍សម្ងាត់យោធា ដូចមានក្នុងខ្លឹមសារសេចក្តីណែនាំលេខ០០៣។

នាយឧត្តមសេនីយ៍ បានផ្តាំផ្ញើទៅកាន់សិក្ខាកាមទាំងអស់ ត្រូវខិតខំសិក្សាស្វែងយល់ ដើម្បីផ្លាស់ប្ដូរបទពិសោធន៍ និងយកចំណេះដឹង ដែលខ្លួនទទួលបានទៅអនុវត្តជាក់ស្ដែង ក្នុងអង្គភាពរបស់ខ្លួន។ ចំពោះយោធាចារ្យសូមចែករំលែកចំណេះដឹង និងបទពិសោធន៍ដ៏មានតម្លៃ ដើម្បីលើកកម្ពស់គុណភាពវគ្គបំប៉ននេះ។

តាំងនាមជំនួសមុខឱ្យឧបនាយករដ្ឋមន្ត្រី ទៀ សីហា, នាយឧត្តមសេនីយ៍ ចាយ សាំងយុន សូមសម្ដែងនូវការកោតសរសើរ ចំពោះការខិតខំប្រឹងប្រែងរបស់ក្រុមការងារដឹកនាំជំរុញអនុវត្តសេចក្តីណែនាំលេខ០០៣ និងសង្ឃឹមជឿជាក់យ៉ាងមុតមាំថា ថ្នាក់ដឹកនាំគ្រប់គ្រងវគ្គ យោធាចារ្យ ក្នុងក្រុមការងារទាំងអស់ និងខិតខំប្រឹងប្រែងអនុវត្តការងាររបស់ខ្លួនឱ្យបានល្អ ដើម្បីបម្រើជូនអង្គភាពប្រកបដោយភាពស្មោះត្រង់ និងការស្មារតីទទួលខុសត្រូវខ្ពស់ និងបានប្រកាសបើកវគ្គបំប៉ន ស្ដីពីការពង្រឹងអនុវត្តលក្ខន្តិកៈទូទៅ ចំពោះយោធិនបទវិន័យទូទៅ និងលំហាត់របៀបនៃកងយោធពលខេមរភូមិន្ទ ចាប់ពីពេលនេះតទៅ៕