«យុទ្ធនាការខ្មែរត្រូវតែខ្លាំង» លើកទី៤ ធ្វើឡើងក្រោមប្រធានបទ៖ «ពង្រឹងភាពខ្លាំងសម្រាប់អាជីវកម្មក្នុងវិស័យសុខាភិបាល»
(ភ្នំពេញ)៖ នៅថ្ងៃទី១៥ ខែមីនា ឆ្នាំ២០២៦នេះ «យុទ្ធនាការខ្មែរត្រូវតែខ្លាំង» បានរៀបចំជាលើកទី៤ ក្រោមប្រធានបទ៖ «ពង្រឹងភាពខ្លាំងសម្រាប់អាជីវកម្មក្នុងវិស័យសុខាភិបាល» ដែលធ្វើឡើងក្នុងគោលបំណងពង្រឹងគ្រឹះសុខភាពប្រជាជន និងជំរុញឧត្តមភាពប្រកួតប្រជែងរបស់វិស័យសុខាភិបាលឯកជនឱ្យកាន់តែរឹងមាំ។
កម្មវិធីនេះរៀបចំឡើងដោយ វិទ្យាស្ថានស៊ីអ៊ីអូ នៅសាលប្រជុំនៃ រាជបណ្ឌិត្យសភាកម្ពុជា ដោយមានការចូលរួមពីថ្នាក់ដឹកនាំមន្ទីរពេទ្យ ម្ចាស់គ្លីនិក ឱសថស្ថាន តំណាងសមាគមគ្រូពេទ្យ និងសហគ្រិនឆ្នើមៗក្នុងវិស័យសុខាភិបាលប្រមាណ ៣០០នាក់។
លោកបណ្ឌិត អោម សេងបូរ៉ា ប្រធានក្រុមប្រឹក្សាភិបាលវិទ្យាស្ថានស៊ីអ៊ីអូ និងជាអ្នកផ្តួចផ្តើម «យុទ្ធនាការខ្មែរត្រូវតែខ្លាំង» បានលើកឡើងថា ប្រជាជនខ្មែរទាំងអស់គ្នា គឺជាសហស្ថាបនិកនៃយុទ្ធនាការនេះ។ លោកបានបញ្ជាក់ថា «យុទ្ធនាការខ្មែរត្រូវតែខ្លាំង» គឺជាចលនាដើម្បីបំផុសស្មារតីប្រជាជនខ្មែរទាំងក្នុងប្រទេស និងក្រៅប្រទេស ឱ្យមានភាពខ្លាំងលើវិស័យសំខាន់ៗជាច្រើន រួមមាន កម្លាំងកាយ កម្លាំងចិត្ត កម្លាំងបញ្ញា កម្លាំងស្មារតី វិន័យ សាមគ្គីភាព ផលិតភាព បច្ចេកវិទ្យា យោធា នយោបាយ និងសេដ្ឋកិច្ច។
លោកបណ្ឌិតបានបន្ថែមថា ការកសាងភាពខ្លាំងរបស់ជាតិ គឺជាកត្តាសំខាន់ក្នុងការធ្វើឱ្យប្រទេសមានសមត្ថភាពទប់ទល់នឹងវិបត្តិ និងឧបសគ្គនានា ជាពិសេសហានិភ័យពីការប្រកួតប្រជែង និងឥទ្ធិពលពីបរទេស។ ជាមួយគ្នានេះ ការបំផុសចលនានេះក៏ជាផ្នែកមួយក្នុងការគាំទ្រដល់ យុទ្ធសាស្ត្របញ្ចកោណរបស់រាជរដ្ឋាភិបាល ដើម្បីសម្រេចគោលដៅឱ្យកម្ពុជាក្លាយជា ប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និង ប្រទេសមានចំណូលខ្ពស់នៅឆ្នាំ២០៥០។
ធម្មទានាចារ្យ កឹម អឿន នាយកប្រតិបត្តិវិទ្យាស្ថានស៊ីអ៊ីអូ បានលើកឡើងថា គុណភាពពលរដ្ឋនីមួយៗ បានកំណត់គុណភាពប្រជាជាតិមួយ ហើយសុខុមាលភាពរបស់ប្រជាពលរដ្ឋ គឺជាគ្រឹះដ៏សំខាន់បំផុតសម្រាប់ការអភិវឌ្ឍជាតិ។
លោកបានប្រៀបធៀបថា កងកម្លាំងប្រដាប់អាវុធ គឺជាអ្នកការពារសុវត្ថិភាពជាតិ ខណៈដែល វិស័យសុខាភិបាល គឺជាកងទ័ពសេដ្ឋកិច្ច ដែលការពារអាយុជីវិត និងកសាងទំនុកចិត្តរបស់ប្រជាជន។
នាយកប្រតិបត្តិវិទ្យាស្ថានស៊ីអ៊ីអូ បានបញ្ជាក់ថា «យុទ្ធនាការខ្មែរត្រូវតែខ្លាំង» លើកទី៤ មានគោលបំណងសំខាន់ក្នុងការពង្រឹងភាពខ្លាំងសម្រាប់អាជីវកម្មសុខាភិបាលកម្ពុជា តាមរយៈគោលដៅសំខាន់៣ចំណុច៖
១៖ ការរួបរួម៖ វិទ្យាស្ថានស៊ីអ៊ីអូ នឹងគាំទ្រការបង្កើត «សហគមសហគ្រិនសុខាភិបាល» ដើម្បីក្លាយជាវេទិកាសម្រាប់ការសហការគ្នា គាំទ្រគ្នា និងជួយគ្នាទៅវិញទៅមក ក្នុងការបង្កើនប្រសិទ្ធភាពអាជីវកម្មសុខាភិបាលឯកជន។
២៖ ស្តង់ដារ៖ វិទ្យាស្ថានស៊ីអ៊ីអូ និងអ្នកពាក់ព័ន្ធនានា នឹងរៀបចំបង្កើត នីតិវិធីប្រតិបត្តិការស្តង់ដារ (SOPs) សម្រាប់ការគ្រប់គ្រង និងដឹកនាំអាជីវកម្មសុខាភិបាលឯកជន ដើម្បីឱ្យមានស្តង់ដារខ្មែរ ដែលអាចប្រកួតប្រជែងជាមួយស្តង់ដារអន្តរជាតិ។
៣៖ សមត្ថភាព៖ វិទ្យាស្ថានស៊ីអ៊ីអូ នឹងរៀបចំកម្មវិធីបណ្តុះបណ្តាល និងបង្វឹកសមត្ថភាពដល់សហគ្រិនក្នុងវិស័យសុខាភិបាល ដើម្បីពង្រឹងជំនាញក្នុងការគ្រប់គ្រង និងផ្តល់សេវាសុខាភិបាលប្រកបដោយគុណភាពវិជ្ជាជីវៈខ្ពស់។
វេទិកានេះក៏មានគោលដៅជំរុញឱ្យវិស័យសុខាភិបាលឯកជនក្នុងស្រុកកាន់តែរឹងមាំ ដើម្បីទទួលបាន ទំនុកចិត្តពីប្រជាពលរដ្ឋ និងកាត់បន្ថយការចំណាយរបស់ប្រជាជនដែលត្រូវទៅព្យាបាលនៅបរទេស ដែលអាចបណ្តាលឱ្យខាតបង់ទាំង សេដ្ឋកិច្ចជាតិ និងកិត្យានុភាពប្រទេស៕