កាដូឆ្នាំថ្មី! អគ្គិសនីកម្ពុជាភ្ជាប់ខ្សែកាបកប់បាតសមុទ្រតង់ស្យុង ៣៥គីឡូវ៉ុលប្រវែង ៤.៤គីឡូម៉ែត្រ ពីកោះរ៉ុង ទៅកោះរ៉ុងសន្លឹម និងដាក់ឱ្យដំណើការរួចរាល់ហើយ !
(ព្រះសីហនុ)៖ ដើម្បីជួយសំរួលជីវភាពដល់ប្រជាពលរដ្ឋ ជាពិសេសនៅតំបន់ដាច់ស្រយាល ដូចជាបណ្តាកោះជាដើម សម្ដេចមហាបវរធិបតី ហ៊ុន ម៉ាណែត បានណែនាំឱ្យក្រសួងរ៉ែ និថាមពល ព្រមទាំងអគ្គិសនីកម្ពុជា សាងសង់ភ្ជាប់បណ្ដាញអគ្គិសនីទៅកាន់បណ្ដាកោះ នៅខេត្តព្រះសីហនុ ក្នុងពិធីសំណេះសំណាលជាមួយមន្រ្ដីរាជការ បុគ្គលិក កម្មករ និយោជិត កំពង់ផែស្វយ័តក្រុងព្រះសីហនុ។
ទទួលបានការណែនាំនេះ អគ្គិសនីកម្ពុជាបានអនុវត្តការងារតាំងពីពាក់កណ្តាលឆ្នាំ ឆ្នាំ២០២៥ ហើយបានបញ្ចប់ដាក់ឱ្យដំណើការនៅថ្ងៃទី១១ ខែមេសា ឆ្នាំ២០២៦ ដោយបានភ្ជាប់ខ្សែកាបកប់បាតសមុទ្រតង់ស្យុង ៣៥ គីឡូវ៉ុល ពីកោះរ៉ុង ទៅកោះរ៉ុងសន្លឹមមុនគេ។
នេះជាលើកទី ១ ក្នុងប្រវត្តិសាស្ត្រ ដែលប្រជាពលរដ្ឋនៅលើកោះនេះ ទទួលបានការផ្គត់ផ្គង់ពីបណ្តាញជាតិ ហើយនឹងឈនទៅទទួលថ្លៃអគ្គិសនីសមរម្យ ដូចបណ្តាញទូទៅ ៧៣០រៀល ក្នុង១គីឡូវ៉ាត់ម៉ោង ព្រមទាំងមានថ្លៃអនុគ្រោះ ៣៨០ រៀល ៤៨០រៀល និង ៦១០ រៀល ក្នុង ១ គីឡូវ៉ាត់ម៉ោង សំរាប់អ្នកមានជីវភាពទាប-មធ្យម ដែលមុននេះមានដល់ទៅ២៩០០រៀលក្នុង១គីឡូវ៉ាត់ម៉ោង គឺចុះពី ៤ ទៅ ៨ ដង។
សមិទ្ធផលថ្មីនេះជាកាដូរថ្មីមួយជូនបងប្អូននៅលើកោះ កាត់បន្ថយចំណាយ បង្កើនជីវភាព តាមរយៈបង្កើតមុខរបរផ្សេងៗ ជាចំណងដៃមនការអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ក៏ដូចជាជួយទាក់ទាញទេសចរណ៍ មកលេងលើកោះធម្មជាតិកាន់តែច្រើនឡើង ដែលចំណែកមួយនៃការកសាងខឿនសេដ្ឋកិច្ចជាតិ។
កន្លងមក អគ្គិសនីកម្ពុជាក៏បានវិនិយោគសាងសង់ខ្សែបណ្ដាញអគ្គិសនីថ្មីជាច្រើនខ្សែ ដើម្បីភ្ជាប់ពីបណ្ដាញអគ្គិសនីជាតិទៅកាន់បណ្ដាកោះនានា នៅទូទាំងប្រទេស ដែលក្នុងនោះរួមមាន កោះស្រមោច កោះម្នាស់ និងកោះរ៉ុង នៅក្នុងខេត្តព្រះសីហនុ កោះស្មាច់ កោះស្ដេច កោះអំពិល កោះសាមិត កោះស្រឡៅ កោះកាពី និងកោះទទឹង នៅក្នុងខេត្តកោះកុង កោះដាច់ និងកោះតាង នៅក្នុងរាជធានីភ្នំពេញ ។
ជាមួយគ្នានេះ អគ្គិសនីកម្ពុជាក៏បាននឹងកំពុងបន្តអនុវត្តយ៉ាងសកម្ម លើគម្រោងសាងសង់ខ្សែកាបកប់បាតសមុទ្រ តង់ស្យុង ២២ គីឡូវ៉ុល ពីកោះស្រមោច ទៅកោះតាគៀវ កោះឫស្សី និងកោះក្របី និងគម្រោងសាងសង់ខ្សែកាបកប់ឆ្លងបាតសមុទ្រ ២២ គីឡូវ៉ុលភ្ជាប់ពីឆ្នេរអូរត្រេះ ទៅកោះខ្ទះ ក្នុងខេត្តព្រះសីហនុផងដែរ ដែលនឹងដាក់ឱ្យដំណើការជាបន្តបន្ទាប់ក្នុងពេលឆាប់ៗនេះ ដើម្បីឱ្យបងប្អូនប្រជាពលរដ្ឋនៅលើកោះ ទទួលការផ្គត់ផ្គង់មានស្ថិរភាពល្អ និងមានតំលៃឯកភាពទូទាំងប្រទេស៕