មន្ត្រីពន្ធដារ និងគយ ចុះអប់រំ និងបង្ក្រាបទីតាំងចែកចាយបារីចំនួន២កន្លែង រឹបអូសបានបារីដែលមិនមានបិទតែមប្រិ៍អាករចំនួន ៦៥១សុង

(ភ្នំពេញ)៖ ក្រុមការងារចម្រុះ ដើម្បីត្រួតពិនិត្យកាតព្វកិច្ចបិទតែមប្រិ៍អាករសម្រាប់បារី របស់អគ្គនាយកដ្ឋានពន្ធដារ និងអគ្គនាយកដ្ឋានគយនិងរដ្ឋាករ កម្ពុជា (ក្រុមការងារចម្រុះតែមប្រិ៍) នាពេលថ្មីៗនេះ បានចុះធ្វើសកម្មភាពអប់រំ និងបង្ក្រាបទីតាំងចែកចាយបារីចំនួន ២ (ពីរ) ស្ថិតនៅក្នុងរាជធានីភ្នំពេញ ដោយទីតាំងទី១ នៅសង្កាត់ផ្សារដេប៉ូទី១ ខណ្ឌទួលគោក បង្ក្រាប និងរឹបអូសបានបារីដែលមិនមានបិទតែមប្រិ៍អាករ (១១ម៉ាក) ចំនួន ៦៥១ សុង និងទីតាំងទី២ ស្ថិតនៅសង្កាត់ ច្រាំងចំរេទី២ ខណ្ឌឬស្សីកែវ ប៉ុន្តែមិនមានចែកចាយបារី ដែលមិនមានបិទតែមប្រិ៍អាករឡើយ។

គួររំលឹកផងដែរថា កន្លងមកក្រុមការងារចម្រុះតែមប្រិ៍ តែងបានចុះធ្វើសកម្មភាពអប់រំ ផ្សព្វផ្សាយដល់អ្នកផលិត អ្នកចែកចាយ និងអ្នកលក់រាយបារីអំពី កាតព្វកិច្ចបិទតែមប្រិ៍អាករលើកញ្ចប់បារីជាច្រើនទីតាំងរួចមកហើយ ហើយក៏បានចុះបង្ក្រាបទីតាំងចែកចាយបារីខុសច្បាប់ ជាបន្តបន្ទាប់ផងដែរ។

ជាថ្មីម្តងទៀត អគ្គនាយកដ្ឋានពន្ធដារ សូមក្រើនរំលឹកដល់អ្នកចែកចាយ និងអ្នកលក់រាយបារីទាំងអស់ សូមបញ្ឈប់ការទិញ-លក់បារី ដែលមិនមានបិទតែមប្រិ៍អាករត្រឹមត្រូវបន្តទៀត ចៀសវាងការខាតបង់ថវិកា ព្រមទាំងប្រឈមនឹងការទទួលរងនូវទោសទណ្ឌនានា ស្របតាមច្បាប់ជាធរមាន។

ជាមួយគ្នានេះដែរ ក្រុមការងារចម្រុះតែមប្រិ៍ ក៏នឹងបន្តចុះផ្សព្វផ្សាយ អប់រំ ណែនាំ អំពីកាតព្វកិច្ចបិទតែមប្រិ៍អាករសម្រាប់បារី និងបង្ក្រាបការលក់ ឬចែកចាយផលិតផលបារីខុសច្បាប់ (បារីមិន មានបិទតែមប្រិ៍អាករត្រឹមត្រូវ) ជាបន្តបន្ទាប់ដូចភ្លៀងរលឹម៕