អគ្គនាយកស៊ីម៉ាក់ ប្រកាសបើកគម្រោងបោសសម្អាតមីន និងសង្គ្រោះជនពិការដោយសារមីន នៅខេត្ដបាត់ដំបង

បាត់ដំបង)៖ លោក ហេង រតនា ប្រតិភូរាជរដ្ឋាភិបាលទទួលបន្ទុក ជាអគ្គនាយកស៊ីម៉ាក់ នៅថ្ងៃទី១៥ ខែមករា ឆ្នាំ២០២៦ បានអញ្ជើញចុះជួបសំណេះសំណាល ជាមួយកម្លាំងប្រតិបត្តិការ និងប្រកាសបើកគម្រោងសមាហរណកម្ម ការបោសសម្អាតមីន និងសង្គ្រោះជនពិការដោយសារមីន ដំណាក់កាលទី៣។ ពិធីនេះ ធ្វើឡើងនៅមណ្ឌលអភិវឌ្ឍន៍ស៊ីម៉ាក់មរតតេជោ ខេត្តបាត់ដំបង។

ដំណាក់កាលទី៣នេះ ជាជំនួយហិរញ្ញប្បទានឥតសំណង របស់រដ្ឋាភិបាលជប៉ុន ផ្តល់ជូនរាជរដ្ឋាភិបាលកម្ពុជា ដើម្បីគាំទ្រគម្រោងបោសសម្អាតគ្រាប់មីន និងការអភិវឌ្ឍសហគមន៍ ក្រោយការបោសសម្អាតមីនរួច ដែលហៅថា គម្រោងបោសសម្អាតមីន ដើម្បីសន្ដិភាព និងការអភិវឌ្ឍន៍ប្រកបដោយចិរភាពសម្រាប់ ខេត្តភាគនិរតី នៃប្រទេសកម្ពុជា។

គម្រោងនេះ មានគោលដៅបោសសម្អាតផ្ទៃដី រងផលប៉ះពាល់ដោយសារគ្រាប់មីន និងសំណល់យុទ្ធភណ្ឌសង្រ្គាមចំនួន៤,៩៣៩ហិកតា ដែលផ្ដល់ផលប្រយោជន៍ ដល់ប្រជាពលរដ្ឋទទួលផលផ្ទាល់ ចំនួនប្រមាណ២៧,០១២គ្រួសារ និងអ្នកទទួលផលដោយប្រយោល មានចំនួនយ៉ាងច្រើន ក្នុងភូមិសាស្រ្ដខេត្តពោធិ៍សាត់ ខេត្តបាត់ដំបង និងខេត្តកោះកុង ព្រមទាំងឆ្លើយតបសំណើសុំអន្ដរាគមន៍បន្ទាន់ ក្នុងខេត្តប៉ៃលិន។

គម្រោងនេះ នឹងត្រូវប្រើប្រាស់កម្លាំងប្រតិបត្តិការចំនួន២២ក្រុម ស្មើនឹង៣០៣នាក់ សុខនចំនួន១៨ក្បាល និងរថយន្តចំនួន ៣៣គ្រឿង ក្នុងនោះកងឯកភាពកំចាត់មីនទី២ មានចំនួន១០ក្រុម និងកងឯកភាពកំចាត់មីនទី៣ មានចំនួន១២ក្រុម៕