ឧបនាយករដ្ឋមន្ត្រី ស សុខា អញ្ជើញសម្ពោធអគារសិក្សាថ្មី នៅវិទ្យាល័យ ហ៊ុន សែន ព្រែកសណ្ដែក ខេត្តព្រៃវែង

(ព្រៃវែង)៖ លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង នៅថ្ងៃទី២៩ ខែសីហា ឆ្នាំ២០២៦ បានអញ្ជើញសម្ពោធដាក់ឲ្យប្រើប្រាស់ជាផ្លូវការនូវអគារសិក្សា ១ខ្នង កម្ពស់ ២ជាន់ នៅបរិវេណវិទ្យាល័យ ហ៊ុន សែន ព្រែកសណ្ដែក ស្ថិតនៅភូមិព្រែកសណ្ដែក ស្រុកស៊ីធរកណ្ដាល ខេត្តព្រៃវែង។ ពិធីដ៏មានសារៈសំខាន់នេះ មានការចូលរួមពីថ្នាក់ដឹកនាំខេត្ត ក្រុមការងាររាជរដ្ឋាភិបាលចុះមូលដ្ឋាន និងមន្ត្រីពាក់ព័ន្ធជាច្រើនរូបទៀតផងដែរ។

លោកអភិសន្តិបណ្ឌិត ស សុខា បានមានប្រសាសន៍គូសបញ្ជាក់ថា អគារសិក្សាថ្មីនេះ ត្រូវបានសាងសង់ឡើងដើម្បីឆ្លើយតបទៅនឹងតម្រូវការជាក់ស្តែងនៃការកើនឡើងនូវចំនួនសិស្សានុសិស្សពីមួយឆ្នាំទៅមួយឆ្នាំ ក៏ដូចជាការចូលរួមចំណែកអភិវឌ្ឍធនធានមនុស្សនៅមូលដ្ឋានស្រុកស៊ីធរកណ្ដាល ឱ្យកាន់តែមានគុណភាព និងប្រសិទ្ធភាពខ្ពស់ស្របតាមយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា។ ការវិនិយោគលើវិស័យអប់រំ គឺជាមូលដ្ឋានគ្រឹះដ៏សំខាន់សម្រាប់កសាងអនាគតប្រទេសជាតិ។

លោកឧបនាយករដ្ឋមន្ត្រី ក៏បានគូសបញ្ជាក់ពីការយកចិត្តទុកដាក់ខ្ពស់របស់រាជរដ្ឋាភិបាលក្នុងការអភិវឌ្ឍវិស័យអប់រំចាប់ពីថ្នាក់ជាតិដល់ថ្នាក់មូលដ្ឋាន ព្រមទាំងបានអំពាវនាវដល់លោកគ្រូ អ្នកគ្រូ សិស្សានុសិស្ស និងអាជ្ញាធរដែនដី ឱ្យជួយថែរក្សាសមិទ្ធផលថ្មីនេះឱ្យបានគង់វង្ស ដើម្បីប្រើប្រាស់បានយូរអង្វែងសម្រាប់កូនចៅជំនាន់ក្រោយ។ អគារសិក្សាថ្មីនេះ គឺជាសមិទ្ធផលមួយទៀតក្រោមការដឹកនាំរបស់រាជរដ្ឋាភិបាលនីតិកាលទី៧ នៃរដ្ឋសភា ដែលបន្តយកចិត្តទុកដាក់ខ្ពស់លើវិស័យអប់រំ ដែលជាគ្រឹះស្ថានបណ្តុះបណ្តាលធនធានមនុស្សប្រកបដោយគុណភាព និងសីលធម៌។

ជាមួយគ្នានេះ លោកអភិសន្តិបណ្ឌិត ស សុខា បានក្រើនរំលឹកដល់រដ្ឋបាលខេត្ត ត្រូវតាមដានពិនិត្យឲ្យបានត្រឹមត្រូវនៅមូលនិធិអភិវឌ្ឍន៍ឃុំសង្កាត់ទាំងអស់ ត្រូវមានតម្លាភាពក្នុងការអភិវឌ្ឍន៍នៅមូលដ្ឋានរបស់ខ្លួនឲ្យមានគុណភាព ប្រសិទ្ធភាព ដើម្បីធានាដល់ការអភិវឌ្ឍន៍នោះប្រកបដោយការរីកចម្រើនគង់វង្សយូរអង្វែង។

ការកសាងអគារសិក្សានេះ គឺដើម្បីដោះស្រាយបញ្ហាប្រឈមនៃការខ្វះខាតបន្ទប់រៀន និងធានាថាបុត្រធីតារបស់ប្រជាពលរដ្ឋទទួលបានបរិយាកាសសិក្សាស្រួលបួល និងមានស្តង់ដារសមរម្យ។