នាថ្ងៃសៅរ៍ ទី២៩ ខែសីហា ឆ្នាំ២០២៦ លោក ជិន ប៊ុនធឿន និងក្រុមការងារ បានចុះពិនិត្យដោយផ្ទាល់លើវឌ្ឍនភាពនៃការសាងសង់អគារសិក្សានៅសាលាបឋមសិក្សា ហ៊ុន សែន ក្របៅ ស្ថិតក្នុងភូមិក្របៅ ឃុំដូង ស្រុកប្រាសាទបល្ល័ង្ក ខេត្តកំពង់ធំ។ ការចុះផ្ទាល់ដល់មូលដ្ឋាននេះ មិនត្រឹមតែដើម្បីពិនិត្យគុណភាពសំណង់នោះទេ ប៉ុន្តែថែមទាំងបានឆ្លុះបញ្ចាំងយ៉ាងច្បាស់ពីសុខទុក្ខ ការលំបាក និងតម្រូវការប្រចាំថ្ងៃរបស់បងប្អូនប្រជាពលរដ្ឋ ក៏ដូចជាក្មួយៗសិស្សានុសិស្សដែលរស់នៅតាមភូមិស្រុកដាច់ស្រយាល ដែលតែងតែរំពឹងទុកលើការយកចិត្តទុកដាក់ពីថ្នាក់ដឹកនាំ។

«ទោះជួបប្រទះឧបសគ្គ និងការលំបាកក្នុងការធ្វើដំណើរឆ្លងកាត់ផ្លូវឆ្ងាយយ៉ាងណាក៏ដោយ ក៏ចិត្តរបស់យើងនៅតែប្តេជ្ញាព្យាយាមឆ្ពោះទៅមុខរហូតដល់គោលដៅ ព្រោះនេះគឺជាមនោសញ្ចេតនា និងព្រហ្មវិហារធម៌ដ៏ជ្រាលជ្រៅដោយក្តីមេត្តាករុណា មិនអាចរំលងបានឡើយពីសំណាក់សម្តេចទាំងទ្វេ ដែលជានិច្ចកាលតែងតែគិតគូរពីសុខទុក្ខ និងការលំបាករបស់ប្រជាពលរដ្ឋនៅតាមភូមិដាច់ស្រយាល»។

បើទោះបីជាស្ថិតនៅតំបន់ឆ្ងាយដាច់ស្រយាលយ៉ាងណាក៏ដោយ ក៏សុខទុក្ខ និងការលំបាករបស់ប្រជាពលរដ្ឋក្នុងការស្វែងរកការអប់រំសម្រាប់កូនចៅ មិនដែលត្រូវបានរំលងពីការគិតគូររបស់ថ្នាក់ដឹកនាំជាន់ខ្ពស់ឡើយ។ គម្រោងសាងសង់អគារសិក្សានៅសាលាបឋមសិក្សា ហ៊ុន សែន ក្របៅ នាពេលនេះ គឺជាអំណោយដ៏ខ្ពង់ខ្ពស់ និងថ្លៃថ្លាបំផុតចេញពីទឹកចិត្តស្រលាញ់ដ៏ជ្រាលជ្រៅរបស់ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំង សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត តាមរយៈការសម្របសម្រួលដ៏យកចិត្តទុកដាក់ពី ឯកឧត្តម ឌី វិជ្ជា និងលោកជំទាវ ហ៊ុន ម៉ាណា។

បច្ចុប្បន្ន ក្រុមការងារនិងជាងស្ថាបនា កំពុងរំដៃសាងសង់យ៉ាងមមាញឹក ដើម្បីឱ្យអគារទាំងនេះលេចចេញជារូបរាងឡើងក្នុងពេលឆាប់ៗខាងមុខ។ សមិទ្ធផលទាំងនោះរួមមាន អគារសិក្សាចំនួន ២ខ្នង ស្មើនឹង ១០បន្ទប់ បន្ទប់ទឹកអនាម័យចំនួន ១ខ្នង ស្មើនឹង ៤បន្ទប់ និងដងទង់ជាតិដ៏ប្រណិតមួយ។ ការលេចធ្លោឡើងនៃហេដ្ឋារចនាសម្ព័ន្ធអប់រំទាំងនេះ គឺជាដំណោះស្រាយដ៏មានប្រសិទ្ធភាពក្នុងការកាត់បន្ថយការលំបាករបស់ក្មួយៗសិស្សានុសិស្សដែលធ្លាប់តែខ្វះខាតបន្ទប់រៀន គ្មានទីធ្លាគំរូ និងធ្លាប់ជួបឧបសគ្គផ្សេងៗក្នុងការសិក្សានៅតំបន់ជនបទដាច់ស្រយាល។

សេចក្តីស្រឡាញ់ និងការគិតគូររបស់សម្តេចទាំងទ្វេ គឺជាស្ពានចម្លងដ៏សំខាន់ដែលមិនអាចបំភ្លេចបាន ព្រោះវាបានចូលរួមកសាងក្តីសង្ឃឹមថ្មីដល់ប្រជាពលរដ្ឋក្រីក្រនៅមូលដ្ឋាន ផ្តល់ឱកាសឱ្យកូនចៅកសិករបានរៀនសូត្រក្នុងបរិយាកាសសមរម្យ និងជួយលើកទឹកចិត្តដល់លោកគ្រូ អ្នកគ្រូក្នុងការបំពេញភារកិច្ចអប់រំបណ្តុះបណ្តាលកូនចៅប្រជាពលរដ្ឋដោយក្តីសោមនស្ស។

សរុបសេចក្តីមក ការចុះពិនិត្យការសាងសង់អគារសិក្សានៅសាលាបឋមសិក្សា ហ៊ុន សែន ក្របៅ ដោយផ្ទាល់ពីសំណាក់លោក ជិន ប៊ុនធឿន និងក្រុមការងារ គឺជាសក្ខីភាពបញ្ជាក់ថា រាជរដ្ឋាភិបាល ក៏ដូចជាថ្នាក់ដឹកនាំជាន់ខ្ពស់ តែងតែស្ថិតនៅជិតស្និទ្ធ និងយកចិត្តទុកដាក់ជានិច្ចចំពោះសុខទុក្ខ ការលំបាក និងការអភិវឌ្ឍមូលដ្ឋាន ជាពិសេសនៅតាមភូមិដាច់ស្រយាល។ អគារសិក្សានិងសមិទ្ធផលទាំងប៉ុន្មាននេះ នឹងក្លាយជាកម្លាំងចលករដ៏ខ្លាំងក្លាក្នុងការទ្រទ្រង់វិស័យអប់រំថ្នាក់មូលដ្ឋាន ធានាបាននូវការបណ្តុះបណ្តាលធនធានមនុស្សប្រកបដោយគុណភាព និងជាទំពាំងស្នងឫស្សីដ៏រឹងមាំ ដើម្បីចូលរួមចំណែកកសាង និងអភិវឌ្ឍប្រទេសជាតិឱ្យរីកចម្រើនថែមទៀតនាពេលអនាគត។