លោក ហ៊ុន ម៉ានី៖ សង្គមមួយអាចរីកចម្រើនទៅបានត្រូវការចាំបាច់ក្នុងការអប់រំ និងបណ្ដុះស្មារតីប្រជាជនវ័យក្មេង ឱ្យចេះគោរព និងឱ្យតម្លៃនូវអ្វីដែលថ្នាក់ដឹកនាំជំនាន់មុនឆ្លងកាត់

(ភ្នំពេញ)៖ លោក ហ៊ុន ម៉ានី សមាជិកគណៈអចិន្រ្តៃយ៍គណៈកម្មាធិការកណ្តាល និងជាអគ្គលេខាធិការគណៈចលនាមហាជន នៃគណៈកម្មាធិការកណ្តាលគណបក្សប្រជាជនកម្ពុជា បានលើកឡើងថា សង្គមមួយអាចរីកចម្រើនទៅបានត្រូវការចាំបាច់ក្នុងការអប់រំ និងបណ្ដុះស្មារតីប្រជាជនវ័យក្មេង ឱ្យចេះគោរព និងឱ្យតម្លៃនូវអ្វីដែលថ្នាក់ដឹកនាំជំនាន់មុនឆ្លងកាត់។

លោក ហ៊ុន ម៉ានី បានថ្លែងបែបនេះ ធ្វើឡើងក្នុងកម្មវិធីបាឋកថា កេរដំណែលរស់៖ គុណតម្លៃ ៧ មករា ក្រោមប្រធានបទ «ដើរតាមគន្លងមគ្គុទ្ទេសក៍ដ៏អស្ចារ្យ» នាព្រឹកថ្ងៃទី២៣ ខែសីហា ឆ្នាំ២០២៦។

នាឱកាសនោះ លោក ហ៊ុន ម៉ានី បានស្វាគមន៍យ៉ាងកក់ក្ដៅ និងសូមថ្លែងអំណរគុណជូនចំពោះ លោកកិត្តិសេដ្ឋាបណ្ឌិត ចម ប្រសិទ្ធ ឧត្តមប្រឹក្សាផ្ទាល់ព្រះមហាក្សត្រ និងជាសមាជិកគណៈកម្មាធិការកណ្តាល គណបក្សប្រជាជនកម្ពុជា ដែលបានចំណាយពេលអញ្ជើញចូលរួមជាវាគ្មិនកិត្តិយស ដើម្បីចែករំលែកក្នុងវេទិកាដ៏មានសារៈសំខាន់នេះ។

លោកបានបញ្ជាក់ថា បាឋកថា កេរដំណែលរស់៖ គុណតម្លៃ ៧ មករា ត្រូវបានរៀបចំឡើងក្រោមការតម្រង់ទិសរបស់ សម្ដេចកិត្តិសង្គហបណ្ឌិត ម៉ែន សំអន ប្រធានគណចលនាមហាជននៃគណៈកម្មាធិការកណ្ដាលគណបក្សប្រជាជនកម្ពុជា ព្រមទាំងអនុលោមតាមទស្សនដឹកនាំដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ក្នុងគោលបំណងផ្ដល់ជាវេទិកាជូនថ្នាក់ដឹកនាំដែលជាតួអង្គប្រវត្តិសាស្ត្រកម្ពុជា ដើម្បីចែករំលែកបទពិសោធន៍ជាក់ស្ដែងក្នុងការដឹកនាំ គ្រប់គ្រង ដោះស្រាយ និងបង្រួបបង្រួមជាតិ។

បាឋកថាដ៏មានសារៈសំខាន់នេះ ក៏ជាការបំពាក់បំប៉នមនសិកា ការគោរពដឹងគុណនូវគំរូវីរភាពថ្នាក់ដឹកនាំ ទទួលស្គាល់ដំណើរស្វែងរកសុខសន្តិភាព និងស្ថិរភាពជូនជាតិ និងប្រជាជន។ វេទិកានេះ ក៏ជាការចូលរួមពង្រឹងទស្សនឯកភាពបក្ស ផ្សារភ្ជាប់ទំនាក់ទំនងអន្តរជំនាន់ ដោយនាំមកនូវឯកភាពក្នុងការដឹកនាំបក្ស និងរដ្ឋ។

លោក ហ៊ុន ម៉ានី បានគូសបញ្ជាក់ថា សង្គមមួយអាចរីកចម្រើនទៅបានត្រូវការចាំបាច់ ក្នុងការអប់រំ និងបណ្ដុះស្មារតីប្រជាជនវ័យក្មេង ឱ្យចេះគោរព និងឱ្យតម្លៃនូវអ្វីដែលថ្នាក់ដឹកនាំជំនាន់មុនបានឆ្លងកាត់។ ឯកឧត្តម បានបន្តថា ការគោរពដឹងគុណនូវវីរភាពរបស់ថ្នាក់ដឹកនាំជំនាន់មុន គឺជាគុណធម៌នយោបាយរបស់គណបក្សប្រជាជនកម្ពុជា ដែលត្រូវបន្តប្រកាន់ខ្ជាប់គ្រប់ជំនាន់។

សូមជម្រាបថា ពុទ្ធិទាំងឡាយដែលវាគ្មិនបានចែករំលែកនៅក្នុងបាឋកថានេះ នឹងត្រូវចងក្រងជាឯកសារសម្រាប់ថ្នាក់ដឹកនាំ និងយុវជនគណបក្សប្រជាជនជំនាន់ក្រោយ ក្នុងការសិក្សាឈ្វេងយល់ និងអនុវត្តផងដែរ៕