ក្រសួងព័ត៌មាន ជំរុញឱ្យសមាគមសារព័ត៌មានទាំងអស់ បន្តពង្រឹងក្រមសីលធម៌វិជ្ជាជីវៈ និងធ្វើបច្ចុប្បន្នភាពរបាយការណ៍ការងារ !
រាជធានីភ្នំពេញ÷ នារសៀលថ្ងៃពុធ ៦កើត ខែស្រាពណ៍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៩ ខែសីហា ឆ្នាំ២០២៦ លោក បណ្ឌិត សួន សុខឌឿន ប្រធានសមាគមអ្នកសារព័ត៌មាន អិន អឹម អ កម្ពុជា និងអន្តរជាតិ រួម ជាមួយ, លោក ចាន់ ឬទ្ធី ទីប្រឹក្សាជាន់ខ្ពស់ , លោក សន រ៉ុន អនុប្រធានទី១ , លោក ទួត កូរ៉េ អនុប្រធាន បានអញ្ជើញចូលរួមកិច្ចប្រជុំបូកសរុបលទ្ធផលការងារអនុវត្តក្នុងឆមាសទី១ ឆ្នាំ២០២៦ និងតម្រង់ទិសលើកិច្ចការងារសម្របសម្រួលអង្គការសមាគមអ្នកសារព័ត៌មាននៅកម្ពុជា។
កិច្ចប្រជុំនេះបានប្រព្រឹត្តទៅក្រោមវត្តមានដ៏ខ្ពង់ខ្ពស់របស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ដោយមានការសម្របសម្រួលពី ឯកឧត្តម សុខ ចាន់ភក្តី រដ្ឋលេខាធិការ និងជាអ្នកសម្របសម្រួលគ្រប់បណ្តាសមាគមនៅក្នុងក្រសួងព័ត៌មាន។ក្នុងឱកាសជួបជុំសំណេះសំណាលនោះ ឯកឧត្តម នេត្រ ភក្ត្រា បានមានប្រសាសន៍ណែនាំ និងជំរុញដល់គ្រប់សមាគមសារព័ត៌មានទាំងអស់នូវចំណុចសំខាន់ៗ រួមមាន ៖
👉 ពង្រឹងក្រមសីលធម៌វិជ្ជាជីវៈ៖ គ្រប់សមាគមត្រូវជួយតម្រង់ទិសដល់អង្គភាពសារព័ត៌មានចំណុះឱ្យខ្លួន ក្នុងការផ្សព្វផ្សាយព័ត៌មានឱ្យបានត្រឹមត្រូវតាមវិជ្ជាជីវៈ។
👉 បណ្តុះបណ្តាលសមត្ថភាព៖ ត្រូវរៀបចំវគ្គបណ្តុះបណ្តាលពង្រឹងសមត្ថភាពដល់អ្នកសារព័ត៌មានក្នុងសមាគម ដើម្បីធានាថាការផ្សព្វផ្សាយនៅលើបណ្តាញសង្គមមិនមានការខុសឆ្គង ដែលនាំឱ្យប៉ះពាល់ដល់តម្លៃ និងកិត្តិយសរបស់អ្នកសារព័ត៌មាន។
ធ្វើបច្ចុប្បន្នភាពរបាយការណ៍ ៖ គ្រប់សមាគមត្រូវធ្វើបច្ចុប្បន្នភាព និងបូកសរុបលទ្ធផលការងាររបស់ខ្លួន រួមមានសកម្មភាពការងារមនុស្សធម៌ និងការងារសម្របសម្រួលដោះស្រាយវិវាទនានា ដើម្បីដាក់ជូនមកក្រសួងព័ត៌មាន ក្នុងគោលបំណងពិនិត្យមើលវឌ្ឍនភាព និងសមត្ថភាពរបស់សមាគមនីមួយៗ។
បន្ថែមលើនេះ ក្នុងកិច្ចប្រជុំនោះក៏មានការចែកជូននូវ «សៀវភៅរបាយការណ៍ស្ថានភាពសេរីភាពសារព័ត៌មាននៅកម្ពុជា» ទៅដល់គ្រប់តំណាងសមាគមទាំងអស់ ដើម្បីយកទៅចែកចាយបន្តជូនដល់បណ្តាអង្គភាពសារព័ត៌មានជាសមាជិកផងដែរ។
នៅក្នុងបរិយាកាសដ៏ស្និទ្ធស្នាលនោះផងដែរ នាទីបញ្ចប់នៃកិច្ចប្រជុំ ឯកឧត្តម នេត្រ ភក្ត្រា រួមជាមួយ ឯកឧត្តម សុខ ចាន់ភក្តី, លោកបណ្ឌិត សួន សុខ ឌឿន,លោកអនុបណ្ឌិត ចាន់ ឬទ្ធី , លោក សន រ៉ុន ,លោក ទួត កូរ៉េ និងថ្នាក់ដឹកនាំបណ្តាសមាគមសារព័ត៌មានទាំងអស់ ក៏បានអញ្ជើញថតរូបជុំគ្នាទុកជាអនុស្សាវរីយ៍ ប្រកបដោយភាពរស់រវើក និងសាមគ្គីភាពយ៉ាងក្រៃលែង ៕
