សម្តេចបវរធិបតី ហ៊ុន ម៉ាណែត៖ រាជរដ្ឋាភិបាលដឹកនាំដោយគណបក្សប្រជាជនកម្ពុជា ប្តេជ្ញាវាស់វែងដីធ្លី និងចេញបណ្ណកម្មសិទ្ធិជូនប្រជាពលរដ្ឋ ហើយនៅតែមិនយកពន្ធលើដីស្រែចម្ការរបស់កសិករ 

(កណ្ដាល)៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី២៩ ខែកក្កដា ឆ្នាំ២០២៦ បានថ្លែងបញ្ជាក់ថា រាជរដ្ឋាភិបាលដឹកនាំដោយគណបក្សប្រជាជនកម្ពុជា ប្តេជ្ញាវាស់វែងដីធ្លី និងចេញបណ្ណកម្មសិទ្ធិជូនប្រជាពលរដ្ឋ ហើយនៅតែមិនយកពន្ធលើដីស្រែចម្ការរបស់កសិករ។

ការថ្លែងបែបនេះរបស់សម្ដេច បានធ្វើឡើងនាឱកាសដែល សម្ដេច អញ្ជើញប្រគល់បណ្ណដីធ្លីជាង២ម៉ឺនបណ្ណ ជូនប្រជាពលរដ្ឋស្រុកខ្សាច់កណ្តាល ខេត្តកណ្តាល។

ឆ្លៀតក្នុងឱកាសនោះ សម្ដេចមហាបវរធិបតី បានលើកឡើងពីបញ្ហាមួយចំនួនដែលអាចកើតមានក្នុងការវាស់វែងដី ការចុះបញ្ជី និងការចែកបណ្ណ តួយ៉ាងដូចជាការកកស្ទះ ឬការយឺតយ៉ាវណាមួយក្នុងការផ្ដល់បណ្ណកម្មសិទ្ធិជាដើម។ ទោះបីជាយ៉ាងណា សម្ដេច ស្នើដល់ម្ចាស់កម្មសិទ្ធិទាំងអស់មានការយោគយល់ចំពោះបញ្ហានេះ ដ្បិតថាមន្ត្រីគ្រប់លំដាប់ថ្នាក់បានខិតខំយ៉ាងសកម្មក្នុងការទប់ស្កាត់វិវាទដីធ្លី តាមរយៈការវាស់វែង និងចេញបណ្ណកម្មសិទ្ធិនេះ។

សម្ដេច បានមានប្រសាសន៍ ប្រសិនជារាជរដ្ឋាភិបាល ឬមន្ត្រីគ្មានឆន្ទៈក្នុងការបំពេញការងារ នោះមិនអាចសម្រេចបានលទ្ធផលវាស់វែងបានជិត ១៤លានក្បាលដីនោះទេ ដែលរំពឹងថានឹងបញ្ចប់ការចែកបណ្ណនៅចុងឆ្នាំ២០២៧ ដែលជាគោលនយោបាយរបស់រាជរដ្ឋាភិបាល ដឹកនាំដោយគណបក្សប្រជាជនកម្ពុជា។

ទន្ទឹមនឹងនេះ សម្ដេច បានមានប្រសាសន៍ពីការលើកឡើងមួយចំនួន ដែលធ្លាប់ប៉ាន់ស្មាន់ថា សង្គ្រាមព្រំដែនកម្ពុជា-ថៃ នឹងធ្វើឱ្យគណបក្សប្រជាជនកម្ពុជាដួលរលំ ហើយគ្រួសារត្រកូលហ៊ុន នឹងរបូតអំណាច។ សម្ដេច បញ្ជាក់ដូច្នេះថា៖ «កុំថាឡើយគណបក្សប្រជាជន ឬកម្ពុជាបែកបាក់ អត់មានទេ! រឿងជាតិនិយមនេះ ធ្វើឱ្យកម្ពុជាកាន់តែរឹងមាំនៅក្រោមរដ្ឋាភិបាលដែលដឹកនាំរបស់គណបក្សប្រជាជន ព្រោះយើងគិតពីផលប្រយោជន៍ជាតិរបស់យើង»។

សម្ដេចនាយករដ្ឋមន្ត្រី បានសង្កត់ធ្ងន់ថា «ដរាបណារដ្ឋាភិបាលដែលដឹកនាំដោយគណបក្សប្រជាជននៅតែបន្ត យើងប្ដេជ្ញាចិត្តក្នុងការវាស់វែងដីឱ្យបានរួចរាល់ជូនបងប្អូនប្រជាពលរដ្ឋ ហើយចំពោះដីកសិកម្មរបស់កសិករគឺនៅតែបន្តមិនយកពន្ធដដែល»៕