រដ្ឋមន្ត្រី នេត្រ ភក្ត្រា៖ កុមារកម្ពុជាជាង ៦,០០០នាក់ មិនទាន់អាចវិលត្រឡប់ទៅផ្ទះ និងសាលារៀនវិញ បង្ហាញជាក់ស្តែងថា ផលវិបាកមនុស្សធម៌ មិនទាន់បញ្ចប់នៃសង្គ្រាមឈ្លានពានរបស់យោធាថៃមកលើទឹកដីកម្ពុជា

(ភ្នំពេញ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន នៅថ្ងៃទី៩ ខែកញ្ញា ឆ្នាំ២០២៦នេះ បានចោទជាសំណួរថា កុមារមិនគួរត្រូវរៀនរស់នៅជាជនភៀសសឹកទេ៖ តើពេលណាទើបកុមារជនភៀសសឹកកម្ពុជាអាចវិលត្រឡប់ទៅផ្ទះ និងសាលារៀនរបស់ពួកគេបាន?

រដ្ឋមន្ត្រីក្រសួងព័ត៌មាន បានបន្តថា ជំនួយមនុស្សធម៌អាចសម្រាលការឈឺចាប់ ប៉ុន្តែមិនអាចជំនួសផ្ទះ សាលារៀន និងសិទ្ធិរបស់កុមារក្នុងការវិលត្រឡប់ទៅរកជីវិតធម្មតាបានវិញឡើយ។ រូបភាពកុមារជនភៀសសឹកកម្ពុជាទទួលអាហារពេលព្រឹក និងបន្តការសិក្សាក្នុងលក្ខខណ្ឌបណ្តោះអាសន្ន នៅខេត្តព្រះវិហារ គួរនាំឱ្យយើងសួរសំណួរលើសពីរឿងអាហារមួយពេល៖ «ហេតុអ្វីបានជាកុមារទាំងនេះនៅតែជាជនភៀសសឹក? ហេតុអ្វីពួកគេមិនទាន់អាចត្រឡប់ទៅផ្ទះ ភូមិ និងសាលារៀនរបស់ពួកគេវិញ»?

ជាមួយគ្នានេះដែរ រដ្ឋមន្ត្រី នេត្រ ភក្ត្រា បានឱ្យដឹងថា ដំណើរទស្សនកិច្ចរបស់បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងលោកស្រី ឃ្យុងណាន់ ផាក នាយិកាប្រចាំប្រទេសនៃកម្មវិធីស្បៀងអាហារពិភពលោក (WFP) ទៅកាន់តំបន់ជនភៀសសឹកក្នុងខេត្តព្រះវិហារ បានបង្ហាញជាក់ស្តែងថា ផលវិបាកមនុស្សធម៌នៃជម្លោះព្រំដែនមិនទាន់បញ្ចប់នៅឡើយទេ។ WFP កំពុងជួយផ្តល់អាហារពេលព្រឹក ដើម្បីឱ្យកុមារមានអាហារូបត្ថម្ភ អាចបន្តការសិក្សា និងរក្សាភាពធម្មតាមួយផ្នែកក្នុងជីវិតដែលត្រូវបានរំខាន។

រដ្ឋមន្ត្រីក្រសួងព័ត៌មាន បានលើកឡើងថា ក្នុងនាមពលរដ្ឋកម្ពុជា សូមកោតសរសើរ WFP និងថ្លែងអំណរគុណចំពោះប្រជាជនជប៉ុន និងដៃគូទាំងអស់ដែលកំពុងជួយកុមារ និងគ្រួសារដែលរងផលប៉ះពាល់។ ប៉ុន្តែ ជំនួយមនុស្សធម៌គឺជាការសម្រាលផលវិបាក មិនមែនជាដំណោះស្រាយចំពោះមូលហេតុដែលធ្វើឱ្យពួកគេនៅតែមិនអាចវិលត្រឡប់ទៅផ្ទះបាននោះទេ។

រដ្ឋមន្ត្រីក្រសួងព័ត៌មាន បានសង្កត់ធ្ងន់ថា កុមារ ៦,០៦៦នាក់ គឺមិនមែនគ្រាន់តែជាតួលេខទេ។ ក្នុងចំណោមប្រជាពលរដ្ឋកម្ពុជាដែលនៅមិនទាន់អាចវិលត្រឡប់ទៅផ្ទះវិញ មានកុមារចំនួន ៦,០៦៦នាក់។ នៅពីក្រោយតួលេខនេះ គឺជាកុមារដែលបាត់បង់ជីវិតប្រចាំថ្ងៃធម្មតា៖ ផ្ទះរបស់ពួកគេ សាលារៀនរបស់ពួកគេ មិត្តភក្តិ សហគមន៍ និងអារម្មណ៍សុវត្ថិភាពដែលកុមារគ្រប់រូបគួរតែទទួលបាន។ កុមារាទាំងនេះកំពុងជាអ្នកបង់ថ្លៃចំពោះផលវិបាកនៃសង្គ្រាមឈ្លានពានរបស់យោធាថៃមកលើទឹកដីកម្ពុជា។

ទន្ទឹមនឹងនេះ រដ្ឋមន្ត្រី នេត្រ ភក្ត្រា បានបញ្ជាក់ថា សាលាបណ្តោះអាសន្នអាចជួយកុំឱ្យការសិក្សារបស់ពួកគេដាច់។ អាហារពេលព្រឹកអាចជួយឱ្យពួកគេមានកម្លាំងចូលរៀន។ ប៉ុន្តែ «បណ្តោះអាសន្ន» មិនគួរក្លាយជា «អចិន្ត្រៃយ៍» សម្រាប់កុមារទាំងនេះឡើយ ខណៈរាជរដ្ឋាភិបាលកម្ពុជា បាននិងកំពុងទាមទារឱ្យថៃត្រូវគោរពឱ្យបានជាដាច់ខាតនូវសេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥ ប្រការ៤ អនុញ្ញាតឱ្យជនភៀសសឹកវិលត្រឡប់ទៅផ្ទះសម្បែងរបស់ពួកគេវិញប្រកបដោយសេចក្តីថ្លៃថ្នូរ និងសុវត្ថិភាព។

រដ្ឋមន្ត្រីក្រសួងព័ត៌មាន បានគូសបញ្ជាក់ថា បន្លាលួសមិនត្រឹមតែបិទយកដីកម្ពុជាទេ វាបិទផ្លូវកុមារទៅផ្ទះ និងសាលារៀនរបស់ពួកគេ។ កម្ពុជាបានលើកឡើងជាបន្តបន្ទាប់អំពីការដាក់របាំង និងបន្លាលួស ការរារាំងការចូលទៅកាន់តំបន់លំនៅឋាន ការខូចខាត និងការកម្ទេចផ្ទះសម្បែង ព្រមទាំងវត្តមានរបស់កងកម្លាំងយោធាថៃខុសច្បាប់នៅលើទឹកដីកម្ពុជា។ បញ្ហានេះមិនមែនគ្រាន់តែជាសំណួរអំពីទឹកដីតែមួយទេ។ ប៉ុន្តែនៅពីក្រោយបន្លាលួស មានផ្ទះដែលប្រជាពលរដ្ឋចង់វិលត្រឡប់ទៅរស់នៅ។ មានសាលារៀនដែលកុមារចង់វិលត្រឡប់ទៅរៀន។ មានស្រែចម្ការដែលគ្រួសារត្រូវការសម្រាប់ជីវភាព និងមានសហគមន៍ដែលត្រូវបានបំបែកចេញពីជីវិតធម្មតារបស់ខ្លួន។

ត្រង់ចំណុចនេះ ត្រូវបានរដ្ឋមន្ត្រីក្រសួងព័ត៌មាន បានបន្ថែមថា នៅពេលសកម្មភាពរបស់ភាគីណាមួយរារាំងប្រជាពលរដ្ឋពីការវិលត្រឡប់ទៅលំនៅឋាន និងធ្វើឱ្យកុមារបន្តរស់នៅក្នុងស្ថានភាពភៀសសឹក ផលវិបាកនោះមាន វិមាត្រសិទ្ធិមនុស្ស និងសិទ្ធិកុមារ ដែលមិនអាចមើលរំលងបាន។ ការកាន់កាប់ដោយកម្លាំងមិនអាចបង្កើតអធិបតេយ្យភាពបាន ហើយបន្លាលួស របាំង ឬហេដ្ឋារចនាសម្ព័ន្ធថ្មី ក៏មិនអាចក្លាយជាខ្សែព្រំដែនថ្មីបានដែរ។ ព្រំដែនត្រូវកំណត់ដោយច្បាប់ និងយន្តការដែលបានឯកភាព មិនមែនដោយកម្លាំង ឬការបង្កើតស្ថានភាពថ្មីលើដី។

រដ្ឋមន្ត្រីក្រសួងព័ត៌មាន បានបន្តថា បទឈប់បាញ់មិនមែនមានន័យត្រឹមតែកាំភ្លើងស្ងប់។ ប្រសិនបើមានការអះអាងថា បទឈប់បាញ់កំពុងត្រូវបានគោរព នោះយើងត្រូវសួរបន្ថែមថា «តើប្រជាពលរដ្ឋអាចវិលត្រឡប់ទៅផ្ទះបានហើយ ឬនៅ? តើកុមារអាចវិលត្រឡប់ទៅសាលារៀនរបស់ពួកគេបានហើយ ឬនៅ?»។

រដ្ឋមន្ត្រី នេត្រ ភក្ត្រា ក៏បានលើកឡើងថា បទឈប់បាញ់មិនគួរត្រូវបានវាស់ត្រឹមការមិនបាញ់កាំភ្លើង។ វាត្រូវមានន័យថា មិនរុលទៅមុខ មិនបង្កើតស្ថានភាពថ្មីលើដី និងមិនធ្វើសកម្មភាពដែលរារាំងការវិលត្រឡប់ដោយសុវត្ថិភាពរបស់ប្រជាពលរដ្ឋ។ បទឈប់បាញ់ដែលកាំភ្លើងស្ងប់ ប៉ុន្តែកុមារនៅតែមិនអាចត្រឡប់ទៅផ្ទះ មិនទាន់ជាសន្តិភាពពេញលេញទេ។

បន្ថែមពីនេះ រដ្ឋមន្ត្រីក្រសួងព័ត៌មាន បានគូសបញ្ជាក់ទៀតថា ដូច្នេះ រូបភាពដែល WFP និងដៃគូកំពុងជួយកុមារជនភៀសសឹក មិនគួរត្រូវបានមើលឃើញត្រឹមជារឿងជំនួយមនុស្សធម៌ទេ។ វាគួរជំរុញឱ្យសហគមន៍អន្តរជាតិសួរសំណួរដ៏សំខាន់ជាងនេះ៖ហេតុអ្វីបានជាកុមារទាំងនេះនៅតែជាជនភៀសសឹក? តើអ្វីកំពុងរារាំងពួកគេមិនឱ្យវិលត្រឡប់ទៅផ្ទះ? ហើយតើពេលណាទើបពួកគេអាចចាកចេញពីសាលាបណ្តោះអាសន្ន និងវិលត្រឡប់ទៅអង្គុយក្នុងថ្នាក់រៀនរបស់ពួកគេវិញ? WFP អាចជួយឱ្យពួកគេមានអាហារ។ សាលាបណ្តោះអាសន្នអាចជួយឱ្យពួកគេបន្តរៀន។ ដៃគូអន្តរជាតិអាចជួយរក្សាក្តីសង្ឃឹម។

រដ្ឋមន្ត្រី នេត្រ ភក្ត្រា បានរំលេចថា ប៉ុន្តែអ្វីដែលកុមារទាំងនេះត្រូវការបំផុត មិនមែនជាជីវិតជនភៀសសឹកដែលប្រសើរជាងមុនទេ។ ពួកគេត្រូវការផ្ទះរបស់ពួកគេវិញ សាលារៀនរបស់ពួកគេវិញ និងសិទ្ធិរស់នៅដោយសុវត្ថិភាពក្នុងសហគមន៍របស់ពួកគេវិញ។ កុមារ ៦,០៦៦នាក់កំពុងរង់ចាំថ្ងៃវិលត្រឡប់ទៅផ្ទះ។ ពិភពលោកមិនគួរត្រឹមសួរថា តើយើងអាចជួយពួកគេបានយ៉ាងដូចម្តេចទេត្រូវសួរផងដែរថា ហេតុអ្វីពួកគេមិនទាន់អាចទៅផ្ទះបាន។

រដ្ឋមន្ត្រី នេត្រ ភក្ត្រា បានសង្កត់ថា សន្តិភាពពិតប្រាកដមិនមែនត្រឹមតែកាំភ្លើងស្ងប់ទេ។ សន្តិភាពគឺនៅពេលឧបសគ្គលើដីលែងរារាំងផ្លូវទៅផ្ទះ នៅពេលគ្រួសារអាចវិលត្រឡប់ដោយសុវត្ថិភាព និងនៅពេលកុមារ ៦,០៦៦នាក់ លែងត្រូវរស់នៅជាជនភៀសសឹក ហើយអាចវិលទៅផ្ទះ និងសាលារៀនរបស់ពួកគេវិញ»។ ប៉ុន្តែកុមារជាង៦០០០ និងស្រ្តីជាង ៩០០០នាក់ នៅតែមិនអាចត្រឡប់ផ្ទះរបស់ពួកគេបានដោយសារតែការឈ្លានពានទឹកដីពីសំណាក់កងទ័ពថៃ ដែលកំពុងកាន់កាប់ទឹកដីកម្ពុជាដោយខុសច្បាប់ក្រោយបទឈប់បាញ់ និងរកលេសសព្វបែបយ៉ាងដើម្បីគេចចេញពីកាតព្វកិច្ច និងកិច្ចព្រមព្រៀងដែលខ្លួនបានឯកភាព៕