លោក សារិន វណ្ណា៖ មន្ទីររៀបចំដែនដីរាជធានីភ្នំពេញ វាយបញ្ចូលគ្រប់មុខសេវាស្នើសុំ ចូលក្នុងប្រព័ន្ធទិន្នន័យជាឌីជីថល ដើម្បីងាយស្រួលឱ្យអ្នកស្នើសុំ តាមដានចរន្តឯកសារគ្រប់ដំណាក់កាល តាមរយៈទូរស័ព្ទដៃផ្ទាល់ខ្លួន

(ភ្នំពេញ)៖ កាន់តែងាយស្រួលសម្រាប់បងប្អូនប្រជាពលរដ្ឋ ដែលដាក់ស្នើសុំសេវាសាធារណៈលើវិស័យដីធ្លី លោក សារិន វណ្ណា ប្រធានមន្ទីររៀបចំដែនដីរាជធានីភ្នំពេញ បានចាត់មន្ត្រីជួយវាយបញ្ចូលគ្រប់មុខសេវាស្នើសុំ ចូលក្នុងប្រព័ន្ធទិន្នន័យជាឌីជីថល ដើម្បីងាយស្រួលបងប្អូនតាមដានរាល់ចរន្តឯកសារ គ្រប់ដំណាក់កាល តាមរយៈទូរស័ព្ទដៃផ្ទាល់ខ្លួន។

លោកបញ្ជាក់ទៀតថា នៅពេលការបំពេញសេវារួចរាល់ អ្នកស្នើសុំនឹងទទួលបានសារ គោរពអញ្ជើញមកទទួលយកបណ្ណកម្មសិទ្ធិ ឬអញ្ជើញមកទទួលយកសំណុំឯកសារទៅបង់ពន្ធប្រថាប់ត្រា យ៉ាងងាយស្រួល។

លោក សារិន វណ្ណា បានបង្ហោះសារអមដោយឯកសារមួយចំនួនដែលមានខ្លឹមសារដូច្នេះថា៖ «ក្រោយមានកំណែទម្រង់តាមបរិបទថ្មី ក្នុងការផ្តល់សេវាសាធារណៈលើវិសយ័ដីធ្លី ដូចនេះការស្នើសុំចុះបញ្ជីបំពេញបន្ថែម ទុតិយតា និងការប្តូរសន្លឹកបណ្ណកម្មសិទ្ធិដែលមាន QR-Code ព្រមទាំងការដាក់បញ្ចាំ ហ៉ីប៉ូតែត…។ល។ ជាទិសដៅបន្តរបស់មន្ទីររៀបចំដែនដីរាជធានីភ្នំពេញ នឹងចាត់មន្ត្រីជួយវាយបញ្ចូលគ្រប់មុខសេវាស្នើសុំ ចូលក្នុងប្រព័ន្ធទិន្នន័យជាឌីជីថល ដើម្បីងាយស្រួលបងប្អូនតាមដានរាល់ចរន្តឯកសារ គ្រប់ដំណាក់កាល តាមរយៈទូរស័ព្ទដៃផ្ទាល់ខ្លួន។ ក្រោយឯកសារត្រូវបានបញ្ចប់រួចរាល់ក្នុងទូរសព្ទដៃ របស់អ្នកស្នើសុំសេវា និងទទួលបានសារ គោរពអញ្ជើញមកទទួលយកបណ្ណកម្មសិទ្ធិ ឬ អញ្ជើញមកទទួលយកសំណុំឯកសារទៅបង់ពន្ធប្រថាប់ត្រា»៕