សម្តេចក្រឡាហោម ស ខេង និងលោកជំទាវ នាំយកទៀនចំណាំព្រះវស្សា ប្រគេនព្រះសង្ឃគង់នៅ ៣៩វត្ត ក្នុងខេត្តបាត់ដំបង

(បាត់ដំបង)៖ នៅព្រឹកថ្ងៃទី២៣ ខែកក្កដា ឆ្នាំ២០២៦ សម្តេចក្រឡាហោម ស ខេង ឧត្តមប្រឹក្សាព្រះមហាក្សត្រផ្ទាល់ ជាតំណាងរាស្រ្តមណ្ឌលបាត់ដំបង និងជាប្រធានក្រុមការងារថ្នាក់កណ្តាលចុះជួយខេត្តបាត់ដំបង រួមជាមួយលោកជំទាវ បានរៀបចំពិធីប្រគេនទៀនចំណាំព្រះវស្សា និងទេយ្យទានបច្ច័យដល់ព្រះសង្ឃគង់នៅចំនួន ៣៩វត្ត ក្នុងក្រុង ស្រុកទាំង១៤ នៃខេត្តបាត់ដំបង។

ពិធីនេះ បានប្រារព្ធឡើងនៅគេហដ្ឋានសម្តេចផ្ទាល់ ស្ថិតនៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង។

ក្នុងឱកាសនោះ វត្តនីមួយៗបានទទួលទៀនវស្សា១គូ គ្រឿងឧបភោគបរិភោគសរុប១៩មុខ និងបច្ច័យមួយចំនួនផងដែរ។ ពិធីនេះក៏មានការអញ្ជើញចូលរួមពីអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងភរិយា ព្រមទាំងលោក អ៊ុយ រី ប្រធានក្រុមប្រឹក្សាខេត្ត លោក សុខ លូ អភិបាលខេត្តបាត់ដំបង និងលោកស្រី ម៉េត រ៉ាវីចិត្រ សុខលូ រួមជាមួយថ្នាក់ដឹកនាំ មន្ត្រីរាជការមកពីមន្ទីរ អង្គភាពនានាជុំវិញខេត្តជាច្រើនរូបទៀតផងដែរ។

ការប្រគេនទៀនចំណាំព្រះវស្សានេះ គឺដើម្បីឧទ្ទិសមហាកុសលជូនដួងវិញ្ញាណក្ខន្ធ សម្តេចអគ្គមហាធម្មពោធិសាល ជា ស៊ីម និងលោកជំទាវ ញ៉ែម សឿន ជា ស៊ីម ព្រមទាំងញាតិកាទាំងប្រាំពីរសន្តាន ទាំងសងខាងដែលបានចែកឋានទៅហើយនោះ។

ពិធីនេះក៏ជាការគោរពតាមទំនៀមទម្លាប់ប្រពៃណីព្រះពុទ្ធសាសនា ដែលព្រះសង្ឃត្រូវគង់ចាំព្រះវស្សារយៈពេល៣ខែ ចាប់ពីថ្ងៃ១រោច ខែទុតិយាសាឍ រហូតដល់ថ្ងៃ១៥រោច ខែកក្តិក។ ការប្រគេនទៀនវស្សា និងទេយ្យវត្ថុ គឺជាកិច្ចការដ៏សំខាន់មួយរបស់ពុទ្ធបរិស័ទ ដើម្បីទ្រទ្រង់ព្រះសង្ឃក្នុងអំឡុងពេលគង់ចាំព្រះវស្សា ដែលជាប្រពៃណីដ៏ល្អផូរផង់តាំងពីបុរាណរៀងមក៕