សម្តេចតេជោ ហ៊ុន សែន៖ គ្រូបង្រៀន និងមន្ត្រីអប់រំ ដែលចូលនិវត្តន៍ មិនស្ថិតនៅក្រោមដំបូលរបស់សមាគមអតីតយុទ្ធជន និងនិវត្តជននោះទេ 

(ក្រចេះ)៖ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានសមាគមអតីតយុទ្ធជន និងនិវត្តជន បានគូសបញ្ជាក់ថា សម្តេចទើបនឹងរៀបចំគ្រូបង្រៀន និងមន្ត្រីក្រសួងអប់រំ យុវជន និងកីឡា ដែលចូលនិវត្តន៍ មិនស្ថិតនៅក្រោមដំបូលរបស់សមាគមអតីតយុទ្ធជន និងនិវត្តជននោះទេ។ ការសម្រេចបែបនេះ ដោយសារតែកន្លងទៅមានសមាគមគ្រូបង្រៀន ជាអ្នកធ្វើការងារលើគ្រូបង្រៀន និងមន្ត្រីក្រសួងអប់រំ យុវជន និងកីឡា ដែលចូលនិវត្តន៍រួចហើយ។

សម្តេចតេជោ ហ៊ុន សែន ប្រកាសពីព័ត៌មាននៃការកែសម្រួលបែបនេះ ក្នុងកិច្ចសំណេះសំណាលជាមួយប្រធានក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានានៅក្នុងខេត្តក្រចេះ នាព្រឹកថ្ងៃចន្ទ ទី៦ ខែកក្កដា ឆ្នាំ២០២៦នេះ។

សូមបញ្ជាក់ថា សមាគមអតីតយុទ្ធជន និងនិវត្តជន ត្រូវបានកែសម្រួលពីសមាគមអតីតយុទ្ធជនកាលពីឆ្នាំ២០២៥កន្លងទៅនេះ។ សមាគមនេះ ដើមឡើយ គឺមានតួនាទីធ្វើកិច្ចការទាំងឡាយពាក់ព័ន្ធអតីតយុទ្ធជន ជាមន្ត្រីយោធា កងរាជអាវុធហត្ថ និងនគរបាល ដែលចូលនិវត្តន៍។ បន្ទាប់ពីកែសម្រួលទៅជាសមាគមអតីតយុទ្ធជន និងនិវត្តជន សមាគមនេះ ក៏ពង្រីកវិសាលភាពគ្របដណ្តប់ទៅលើមន្ត្រីរាជការស៊ីវិលដែលចូលនិវត្តន៍ថែមទៀត។

របាយការណ៍របស់សមាគម បានបញ្ជាក់ថា បច្ចុប្បន្ននេះ អតីតយុទ្ធជន និងនិវត្តជន មានចំនួនសរុប ១៧៧ ២៨១នាក់។ អ្នកនៅក្នុងបន្ទុកសរុបចំនួន ១៧៧ ៨៧៧នាក់ ដែលកំពុងទទួលប្រាក់របបសន្តិសុខសង្គមប្រចាំខែពីរដ្ឋ ក្នុងនោះមានអតីតយុទ្ធជនចំនួន ១១៩ ៣២៦នាក់ ព្រមទាំងអ្នកនៅក្នុងបន្ទុកចំនួន ១៩២ ៣៩៨នាក់ និងអតីតមន្ត្រីរាជការស៊ីវិលមានចំនួន ៥៧ ៩៥៥នាក់ ព្រមទាំងអ្នកនៅក្នុងបន្ទុកចំនួន ១៥ ៤៧៩នាក់៕